Таңды кожууннуң Дүрген суурда бажың-интернатта чурттап турар кырганнарга болгаш инвалидтерге кожууннуң прокурорунуң оралакчызы Аян Опай интернетте мөлчүкчүлерге мегелетпезиниң аргаларын тайылбырлап берген.
Интернет-мөлчүкчүлер “банкының айыыл чок чорук албанындан”, “хоойлу-дүрүм органнарының ажылдакчыларының адындан” телефоннап, хамаатыларның хууда персоналдыг медээлерин билип ап, оларның банкыларда агар саннарындан акшаны телефон дамчыштыр уштуп аппаар таварылгалар сөөлгү үеде көвүдээн. Бо чылдың баштайгы дөрт айларында Тываның 200 ажыг чурттакчылары шак ынчаар интернет-мөлчүкчүлерге мегеледип, акша-төгериин алысканнар. Хамаатыларның чамдыызы интернет-мөлчүкчүлерже боттары акшаны шилчидиптер таварылгалар база эвээш эвес.
Интернетте мөлчүкчүлерге мегелетпезиниң аргаларын тайылбырлап бергени дээш, бажың-интернатта чурттап турар кырганнар болгаш инвалидтер кожууннуң прокурорунуң оралакчызы Аян Опайга өөрүп четтиргенин илереткеннер.
ТР-ниң прокуратуразының медээлеринден Ш. МОНГУШ белеткээн.
Чуруктарны интернеттен алган.
«Шын» №42 2024 чылдың июнь 8