Өөредиглиг чугаа
Бир кижи мерген угаанныг кырганга келгеш, чугаалаан:
— Мерген угаанныг-дыр силер. Үргүлчү чиик-чаагай, эки хөөннүг чоруур-дур силер. Мени база ындыг болур кылдыр өөредип көрүңерем.
Кырган чөпшээрешкеш, ол кижиге картофель биле хап эккээрин дилээн.
— Бир-ле кижиге хорадап азы хомудай бээр болзуңза, картофельден алгаш, аңаа ол кижиниң адын бижээш, хапче суп алыр сен.
— Ол-ла бе? – деп, кижи элдепсинип айтырган.
— Чок — деп, кырган харыылааш, – Ол хапты үргүлчү бодуңга ап чоруур сен. Бир-ле кижиге хорадап азы хомудай бергеш-ле, ол хавыңче картофельден немей суп турар сен.
Кижи чөпшээрешкен. Кезек үе эрткенде, ооң хавы долгаш, аартай берген. Ону үргүлчү ап чорууру берге апарган. Ооң кадында, хапта баштай суккан картофельдери ирээш, чыдып, чамдыызы өзүп, бир өскелери чечектелип эгелээн.
Ол кырганга катап келгеш, чугаалаан:
— Бо хапты ап чорууру берге апарды. Бирээде, дыка аар-дыр, ийиде, картошкалар ирип эгелээн. Оон өске аргадан айтып бериңерем.
— Кижилерниң сагыш-сеткилинде база шак-ла мындыг чүүл болуп турар. Бис ону дораан эскербес бис. Кылып турар чүүлдеривис чаңчыл апаар, оон чаңчыл аажы-чаңче шилчээш, аар чүък болур. Бо бүгүнү кыдыындан көөр арганы сеңээ бердим. Бир-ле чүүлге хомудаан азы бодуң бир кижини хомудадыр мурнунда, ол чүък сеңээ херек бе деп бодан.
“Шын” №86 2024 чылдың ноябрь 9