ТР-де Россияның Кеземче күүселдезиниң федералдыг албан эргелелиниң 1 дугаар Истелге изоляторунга Башкылар хүнүнге тураскааткан байырлыг хемчег болуп эрткен. Башкыларынга байыр чедирери-биле элээдилер ѳѳренир класстарын чараштыр дерип, дыка хѳй чогаадыкчы хемчеглерни белеткеп, аажок кызып белеткенген.
Суд болурунга чедир назы четпээн ажы-тѳлге ѳѳредилгени истелге изоляторунда чорудуп турарын сагындыраал. Элээдилер школа программазы-биле кичээлдеп турар. Школаларда дег бир дѳмей: класстар бар, башкылары ном, кыдырааш, демир-үжүктерни үлеп бээр, кичээл үезинде самбыраны ажыглап турар.
«Бистиң оолдарывыс чүгле ѳѳренип турар эвес, а күш-культура болгаш спортка хандыкшып, оларны шын хевирлээринче улуг кичээнгейни салып турар бис. Тѳѳгүлүг лекцияларны номчуп, патриотчу хемчеглерге киириштирип, кадык амыдыралга ѳѳредип, наркотиктерниң хоразының дугайында билиндирип турар бис» – деп, истелге изоляторунуң кижизидилге бѳлүүнүң улуг инспектору Анастасия Шагдыр демдеглээн.
Элээдилерниң бодалы-биле, башкылар чаа билиглерни шиңгээдип алырынга, моон үне бергеш, улаштыр эртем-билиг чедип ап, ѳѳрениринге, ортумак болгаш дээди ѳѳредилге черлеринче кирип алырынга хемчээл чок дузаны чедирип турар.
/ Медээни Тывада Россияның Кеземче күүселдезиниң федералдыг албан эргелелиниң парлалга албанындан алган.
“Шын” №77 2024 чылдың октябрь 9