Россияның социал фондузунуң Тывада салбырының эксперттери келир үениң аваларынга болгаш ажы-төлдүг өг-бүлелерге тайылбыр ажылын чорудуп, амы-хууда хүлээп алыышкынны ол хүн организастаар. Аңаа чаңгыс аай пособие дугайында болгаш ооң төлевирлерин чорударының дүрүмнерин тайылбырлаар.
«Чаңгыс аай пособие хүннерин ай санында сөөлгү суббота хүннеринде эрттирип турар. Чүгле квартал төнчүзүнүң үш дугаар субботазында болбас. Тываның Социал фондузунуң эрттирип турары чаңчыл болган ужуражылгаларынга 2026 чылда чүс ажыг өг-бүле киржип, специалистерниң хүлээп алыышкынынче кирген. Чаңгыс чер чурттугларывыс хөй кезиинде төлевирлер хуусааларының хүннерин чаңгыс аайлап бээрин, 2026 чылдың январь 1-ден тура күш кирген 8 ажыл төлевириниң кудуку хемчээлиниң дугайында негелделер болгаш алиментилерни база хамаарыштырарының дугайында айтырыгларлыг кээп турар» – деп, фондунуң башкарыкчызы Часкал Дараа дыңнадып турар.
Чаңгыс аай пособие хүнүнде Тываның чурттакчылары 2026 чылдың июнь 1-ден эгелээн чылда чаңгыс катап бээр өг-бүле төлевириниң дугайында консультацияны база ап болур.
Хемчег Кызыл хоорайның Красноармейская кудумчузу, 146 дугаар бажыңда Социал фондунуң оран-савазынга 8.30 шактан 14.30 шакка чедир болур. Баш бурунгаар бижидилге чокка хүлээп алыышкынга кээп болур.
Билдинмес айтырыглар бар болза, понедельник – четверг хүннеринде 9.00 шактан 18.00 шакка чедир, пятницада 9.00 шактан 16.00 шакка чедир регионнуң чаңгыс аай контакт-төвүнүң 8 800 100 00 01 шугумунче халас долгап болур.
/ Медээни Социал фондунуң Тывада салбырындан алган.
“Шын” №24 2026 чылдың июнь 25
"Шын" солуннуң МАХ-каналынга каттыжыңар: max.ru/join/egenQ...