Республикада одалга сезону эгелээни-биле хөй аал чурттаар бажыңнарның чурттакчылары квартираларында соок база батареялары дески эвес чылыдып турарынга хомудалдар саны көвүдээн. Республиканың Чуртталга-коммунал ажыл-агый яамызы болгаш Регионнуң күрүнениң чуртталга болгаш тудуг хайгааралының албаны ол айтырыгларны шиитпирлээр дээш «изиг шугумнарны» ажылдаткан.
Тываның чуртталга-коммунал ажыл-агый сайыды Мерген Дагба баштаан ажылчын бөлүк чоннуң хомудалдыг айтырыгларынга дүрген харыылап, шиитпирни үндүрер. Харыысалгалыг кижилер айтырыгларга бир шак дургузунда харыыны бээр ужурлуг деп айтыышкында айыткан. Республиканың чурттакчылары квартираларында батареяларның соогун +7 (952) 751-88-90 дугаарлыг телефонче долгааш, дыңнадып болур.
Оон аңгыда яамының чамдык ажылдакчыларын хамаатыларның чылыдылга айтырыгларын дүрген шиитпирлээр харыысалгалыг кылдыр быжыглаан:
- Кызыл хоорайда: О.Б. Тюлюш, харылзажыр телефону +7(39422) 6-65-00;
- Шагаан-Арыг хоорайда: А.А. Агбаан, К.Б. Салчак, харылзажыр телефону +7 (39422) 3-00-01;
- Ак-Довурак хоорайда, Хову-Аксы суурда: А.А. Монгуш, С.М. Данчыт, харылзажыр телефону +7 (39422) 3-22-49.
Бажыңнарда эвээш температураның азы чылыгның чедишпезиниң чылдагааны– одалга шугумунда хейлиг агаар азы батареяларның тунганы азы шын эвес кожуп каанындан соок бооп болур. Ынчангаш квартираларда чогуур температура чогун чайладыр болгаш чылыгны киирер дээш, дүрген хөделири чугула.
Хөй аал чурттаар бажыңнарже чылыгны берип турар үе-чадада башкарыкчы компаниялар чоннуң хомудалдарын хүлээп ап, ону чайладыр ужурлуг дээрзин Чуртталга-коммунал ажыл-агый яамызы онзалап демдеглээн. Бир эвес бажыңны харыылап турар башкарыкчы компания чурттакчыларның хомудалдарын тоовас болза, 08.30 шактан 17.30 шакка чедир дараазында дугаарда +7 (39422) 5-68-01 Күрүнениң чуртталга инспекциязынче хомудалды киирип болур.
Медээни болгаш чурукту Тываның Чазааның парлалга албанындан алган.
“Шын” №37 2025 чылдың сентябрь 25Оценили 13 человекПоказать список поделившихся