Ноябрь 9-та Россия Федерациязында чарлаттынган кѳдээ ажыл-агый ишчилериниӊ профессионал байырлалын Мѳген-Бүренге демдеглеп эрттирген.
Тыва чоннуӊ үндезин амыдыралы, кѳдээ ажыл-агыйны хѳгжүдүп, ажылдап, амыдыралды тудуп чоруур ишчилерге чоргаарланыр бис. Тараадан, мал-маганның эът-сүдүнден кылган аъш-чем – бүгү чоннуӊ амыдыралы шупту кѳдээ ишчилерниӊ холунда. Оларныӊ ажыл-ижи бүдүн чылдыӊ дургузунда үзүктел чок. Ынчангаш кѳдээ ишчилерниӊ күжүн үнелеп, хүндүлээри чугула.
Ажыл-ишти билдилиг удуртуп, ажылдакчыларыныӊ, малчыннарыныӊ амыдыралы дээш уйгу-чыдын билбес удуртукчувус «Мѳген-Бүрен» КХН-ниң директору Өшкү-Саар Аракчааевна Ооржактың ол хүн тургускан программазы кончуг солун, ажыктыг, байырланчыг болду.
Тыва Республиканыӊ Дээди Хуралыныӊ депутаттары, Мѳӊгүн-Тайга кожуун чагыргазыныӊ аӊгы-аӊгы адырларыныӊ специалистери, Мѳген-Бүрен суму чагыргазыныӊ удуртулгазы, улуг кѳжүп чоруур комиссия эртенги шакта чыылган малчыннарга чаӊгыстап хүлээп алыышкынны чоруткан. Мындыг эптиг байдалдарны тургузуп бергенинге кадарчылар ѳѳрээн. Олар амы-хууда таваржып турар ажыл-агыйжы айтырыгларын келген аалчыларга чугаалап бээрге, кандыг арга-биле шиитпирлеп болурун даргалар бижип ап, арга-сүмелерни берип турганнар. Ылаӊгыя хоорайга эмчилеп алырыныӊ бергезин чугаалап, дуза кадар дилеглерни малчыннар киирген.
Спортчу хемчеглерни суурнуң спорт залыныӊ болгаш школаныӊ тренер башкылары организастап эрттиргеннер. Кандыг-даа спортчулардан ажыг малчыннарның эрес-кашпагай, чараш оюннарын чон диӊмиттии-биле аарыкчылап кѳргеннер. Шупту 7 команда ачыр-дачыр тудушканыныӊ түӊнелинде ниити сан-биле шылгараӊгай болуп илерээн «Хойжулар» командазы (Маска Таӊдыжап, Намы Эзир-оол, Күскен-оол Айдаш, Ховалыг Ольга, Куулар Шеӊне) тиилекчи болган. 20–30 хар аразы аныяк малчыннардан дудак чокка киришкен хоочун Владимир Серээевич Саая адак-бышкаа чиик, ёзулуг-ла шимченгир ажылдап, кадык-чаагай амыдыралды тудуп чоруурун бадыткады.
Культура одаанга 2025 чылдыӊ түӊнелдерин үндүрүп, ажыл-агыйы шылгараӊгай малчыннарны болгаш специалистерни байырлыг байдалга шаӊнаан. Тыва Республиканыӊ Дээди Хуралындан, Мѳӊгүн-Тайга кожуун чагыргазындан, Мѳген-Бүрен суму чагыргазындан, «Мѳген-Бүрен» КХН-ниң дирекциязындан шаӊнал-мактал хөй болган.
Мѳген-Бүрен сумузунуӊ талантылыг аныяктары, ѳѳреникчилери, культура ажылдакчылары, албан черлериниӊ болгаш бо хүннүӊ маадырлары – кѳдээ иштиӊ специалистери, малчыннарыныӊ каттышкан концерти солун, байырлыг байдалды тургузуп, залда чон тура халчып, танцылап тараан.
Мал-маган аразында чоруур малчыннарывыс шупту барык 100 хуу чыглып келгеш ужуражып, чугаалажып, ойнап-хѳглеп, шаӊнадып-мактадып, мындыг чараш байырлалды тургузуп берип турарынга малчыннарныӊ ѳмүнээзинден Маруся Александровна четтиргенин илереткен.
Чымыштыг ажылдыӊ ишчилеринге холу дыӊзыг ажылдап, мал-маганы хүр-менди кыш ажып, ал боттары каӊ кадык, кылган ижи бедик чедиишкиннерлиг болурун йөрээп тур бис!
Арина ИРГИТ, Мөген-Бүренниң Алдын-оол Севек аттыг ном саӊыныӊ эргелекчизи.
Чурукту авторнуң архивинден алган.
“Шын” №45 2025 чылдың ноябрь 20