Тывага чаа өөредилге чылында 2 муң ажыг өөреникчи чаарттынган школаларга өөренип эгелээр. Амгы үеде кожууннарда 6 школада капитал септелге ажылдары кидин түлүк чоруп турар. Сентябрь айда өөредилге черлери уругларга эжиктерин ажыдып, чаа чараш оран-савага олар өөренип эгелезин дээш, тудугжулар өөредилге чылының эгезинге чедир доозарын кызыдып турарлар.
“Бүгү-ле экини уругларга” федералдыг программаның болгаш “Аныяктар болгаш уруглар” деп чаа национал төлевилелдиң ачызында өөредилге черлериниң байдалын экижидер талазы-биле ажылдар калбаа-биле чоруп турар дээрзин Тываның Баштыңы бодунуң блогунда демдеглээн.
Бо чылын хөй-ле школаларда чаартылгалар чоруп турар. Оларга барык чартык чүс чыл дургузунда капитал септелге ажылдары чоруттунмаан. “Сорулга шыңгыы. Онза кичээнгейни Кызыл кожууннуң Сукпак, Чеди-Хөлдүң Хову-Аксы дээн ышкаш улуг школаларынче угландырып турар” – деп, Тываның Баштыңы демдеглээн.
Ол ышкаш Бай-Тайганың Кызыл-Даг болгаш Сүт-Хөлдүң Бора-Тайга суурларда септелге ажылдары адакталган дээрзин база дыңнаткан.
Шупту школаларда септелге ажылдары калбаа-биле чоруп турар. Ооң иштинде суг хандырылгазының болгаш канализация системаларын чаартыр болгаш оон-даа өске чугула хемчеглер бар.
Школаларның материал-техниктиг баазазы база чаарттынар дээрзин Владислав Ховалыг демдеглээн. Өөредилге черлериниң девискээрлери чүгле школачыларга эвес, а башкыларга база таарымчалыг болур ужурлуг. Ол өөредилгениң шынарын экижидеринге идиг болур дээрзинге регионнуң удуртукчузу идегеп турар.
Өөреникчилерге болгаш оларның башкыларынга келир өөредилге чылында кайгамчыктыг чаартылгалар келир.
Чыжыргана СААЯ белеткээн.
Улуг-Хем кожууннуң өөредилге эргелелиниң социал четкиде арнындан алган.
“Шын” №27 2025 чылдың июль 17