Идик-хеп кетпес уругларга көгүдүглер:
Теп-теп, кежээкей,
Теве саар идииң кет.
Топ-топ, кежээкей,
Тонуң кет, чарашпай.
Хептерин боду кедер
Кежээпейни көрүңер даан.
Тонун кеткеш, базыпты,
Тоолзуг маадыр көрүңер даан!
Чаа кылаштап өөренип турда:
Бирээ, ийи, бөөп-бөөп,
Бир бастым, бөөп-бөөп.
Бөөп-бөөп, бөпүйлең,
Бөпүй-бөпүй бурунгаар.
Бирээ, ийи, үш…
Майтак койгун маңна, маңна,
Майыктаажы уштун, уштун.
Чем чивес уругларга:
Амык дег чаагайын көр даан!
Аксың ажыт, шымда-шымда!
Ам бир шопулак, ням-ням!
Каак-каак, кежээ кижи
Кадыын чип аар, кежээ кижи
Чөкпектиг чемин чиир.
Чөптүгбейим, эреспейим.
Каак-каак, кежээ кижи,
Кадыын чип аар, кежээкейим!
Пээй-пээй, чараш кижи,
Бестен чип ал, чарашпайым!
Куулар Ч.Ч. – Матпаадыр. – Тываның ном үндүрер чери. – Кызыл – 1991. – 32-33-кү арыннар.
“Шын” №22 2024 чылдың март 23