«Чаа сорук» төлевилелдиң Бии-Хем кожууннуң Өөк сумузундан 2021 чылдың киржикчилери – Алексей биле Сайсуу Байкаралар. Олар көктүг-шыктыг Могай деп черде малчын турлаан тудуп алганнар.
Малчыннар күрүнеден алган 20 баш хунажын инээниң баш санын өстүрүп көвүдеткеш, ийи чыл эрткенде, кожууннуң өнчүзүнче дамчытканнар. Байкаралар чурттаар бажың, кажаа-хораадан аңгыда, чунар-бажың, серилиг чайгы паштаныр чер, аңмаарны немей тудуп алганнар.
– Мал ажылынга черле сонуургалдыг болгаш, «Чаа сорук» төлевилелин чарлаптарга, улуг күзел-биле кириштивис. Бирги кыш хүр-менди эрткен. Бо кыжын каражалыг болдувус, каш баш инек хораан.
Өршээл болуп, кокай харын-даа өдекче кирбейн турар. Чоорту кажааны улгаттырар, машина тургузар чер болгаш бажың тудар дээш кылыр ажыл-ла хөй – деп, өгнүң эр ээзи ажыл-ижин болгаш сорулгаларын таныштырды.
Байкаралар дөрт ажы-төлдүг. Өгнүң кыс ээзи саан үезинде уругларынга ак чемни кылып берип турар. Улуг уруу Томск хоорайда сургуул. Үш ожук дажы дег оолдары ада-иезиниң солуттунмас дузалакчылары. Олар тыва кижиниң чаңчылчаан ижинге чажындан тура өөренип, өзүп турар.
Шончалай ХОВАЛЫГ.
Авторнуң тырттырган чуруктары.