Күрүне хамааты албан-хаакчызы-биле албан керээзин үзе чарарынга чаа барымдааны тургузарының дугайында федералдыг хоойлу төлевилелиниң Тывага сайгарылгазы болуп эрткен.
Күрүне Думазының регионнарже тараткан төлевилелинде профессионал ажыл-чорудулга үезинде база ажыл албанындан өске үеде күрүне албан-хаакчының ат-алдарын болгаш төлептиг мөзүзүн баксыраткан чоруу дээш ажылдан хостаарын сүмелээн.
«Россия Федерациязында күрүне хамааты албанының дугайында» амгы хоойлу албан ажылының үезинде база оон өске үеде эрге-байдалынга дүүшпес кылган чоруу дээш, күрүне албан-хаакчызынга корум-чурум харыысалгазы көрдүнмээн болганындан, шак ындыг инициатива үнген.
Чижээ, албан ажылдан өске үеде эзирик байдалдыг кылган орук-транспорт болуушкуну ындыг чорукка хамааржыр. Орук озал-ондаа дээш буруулуг кижи тускай хоойлужудулга-биле харыылаар ужурлуг.
Албан-хаакчының ажылдап турары күрүне органы, азы удуртулга чери ажыл албанындан өске үеде кылган чоруу дээш, кызыгаарлаашкыннар болгаш хоруушкуннар чок болганындан, чурум үрекчизинге кандыг-даа кеземче онаавайн турган.
Күрүне Думазы ол чедир кылдынмаан ажылды эдери чугула деп санаан. Күрүнениң хамааты албаны күрүнениң албанының онза хевири кылдыр санадыр. Ол албан-хаакчы кижиге тускай эрге-хоойлу эрге-байдалын баш бурунгаар тодарадып берип турар. Ынчангаш хоойлу чогаадыкчылары эрге-чагырга органнарының ат-алдарын баксырадыр чоруктарны сагындырып, ону болдурбазынче угланган норманы, ылавылаарга, ат-алдарын баксыраткан чоруу дээш керээзин үзе чарарын саналдаан.
Тываның Чазаа федералдыг парламентарийлерниң бот-идепкейин деткип, бодунуң шиитпирин республиканың Дээди Хуралынче бадылаар кылдыр чоруткан.
ТР-ниң Чазааның парлалга албаны.