Тыва Республиканың Күрүне чөвүлелиниң хуралы Тываның Чазааның бажыңынга декабрь 23-те болуп эрткен. Ону Тываның Баштыңы Владислав Ховалыг ажыдып тура, Күрүне чөвүлели эрге-чагырганың бир чугула кезээ, ылаңгыя кончуг чугула шиитпирлерни деңзигүүрлүг хүлээп алырынга ол улуг салдарлыг деп чугаалаан.
Күрүне чөвүлелиниң кежигүннерин солуштурарының негелдези ёзугаар ооң составынче республика чергелиг албан-дужаалдыг 6 удуртукчуну, кожуун чергелиг албан-дужаалдыг 24 удуртукчуну киирген. Чаа кежигүннерниң аразында Тыва Республиканың Чазааның Даргазының оралакчызы Олег Лукин, ТР-ниң Дээди Хуралының Даргазының оралакчызы Андрей Листков, Ак-Довурак хоорайның чагырга даргазы Руслан Моңгуш дээш өскелер-даа бар. Оларга Күрүне чөвүлелиниң кежигүнүнүң хөрек демдектерин болгаш шынзылгаларны тывыскан.
Күрүне чөвүлелиниң хуралынга 2021–2024 чылдарда национал төлевилелдерни канчаар боттандырганын сайгарып чугаалашкан. Ол талазы-биле Тываның Чазааның Даргазының оралакчызы Олег Лукин илеткээш, боттандырган төлевилелдерни адап санап, 2019 чылдан бээр төлевилелдерни боттандырарынга федералдыг бюджеттен 42 миллиард рубльди (ол дээрге акшаландырыышкынның 97 хуузу), республиканың бюджединден 1,5 миллиард рубльди (акшаландырыышкынның 3 хуузу) үндүргенин демдеглээн.
Национал төлевилелдерни боттандырганы Тываның чурттакчыларының амыдырал-чуртталгазының шынарын экижидеринге салдарлыг болганын, улуг хемчээлдиг болгаш чугула төлевилелдерни моон-даа соңгаар чедиишкинниг боттандырып болурунуң таваан тургусканын Тываның Баштыңы Владислав Ховалыг айыткан.
Россияның Украинада чорудуп турары тускай шериг операцияга киржилге үезинде балыглаткаш, кадыы баксыраан дайынчыларга кандыг дузаны көргүзүп турарын база Күрүне чөвүлелиниң хуралынга чугаалашкан. Тыва Республиканың Чазааның Даргазы Орлан Сарыглар бо айтырыг талазы-биле илеткээн. Тускай шериг операцияга киржилге үезинде балыглаткаш, кадыы баксыраан дайынчыларга кандыг дузаны күрүнениң медицина болгаш социал албан черлери чедирип келгенин тодаргайы-биле чугаалаан.
Украинага тускай шериг операцияны Россия эгелээнинден бээр үеде Ада-чурттуң камгалакчыларындан болгаш оларның өг-бүлелеринден 10 583 билдириишкин киргенин, 7 924 дайынчыларга болгаш оларның чоок кижилеринге дузаны чедиргенин “Ада-чурттуң камгалакчылары” күрүне фондузунуң Тывада салбырының удуртукчузу Мерген Кызыл-оол дыңнадып, бо ажыл улам күжениишкинниг чоруп турарын чугаалаан.
Тускай шериг операцияга хөделиишкиннер үезинде балыглаткаш, кадыы баксыраан дайынчыларга медицина болгаш социал дузаның чаңгыс аай төвүн тургузар дугайында база Тыва Республиканың Күрүне чөвүлелиниң хуралынга чугаалашкан.
Ш. МОҢГУШ.
Чиңгис Сааяның тырттырган чуруу.
“Шын” №99 2024 чылдың декабрь 25