Октябрь 3-те “Ада-чурттуң камгалакчылары” регионалдыг күрүне фондузунга социал керээ программазынга киржип, улаштыр боттарының ажыл-агыйын сайзырадыр дээн тускай шериг операциязының киржикчилерин болгаш оларның өг-бүлезиниң кежигүннерин Чонну ажылга хаара тудар төптүң болгаш күрүне фондузунуң төлээлеринден тургустунган комиссия хүлээп алган. Ниитизи-биле республиканың кожууннарындан күрүне деткимчезин алыры-биле, 30 ажыг кижи билдириишкинни киирген.
Комиссия кежигүннери кижи бүрүзүнүң документилерин хынап көргеш, бизнес төлевилелдерин допчузу-биле өөренип көрген.
Республиканың Күш-ажыл болгаш социал политика яамызы база “Ада-чурттуң камгалакчылары” регионалдыг фонд дугуржулга ёзугаар ТШО киржикчилерин болгаш оларның өг-бүлелериниң кежигүннерин социал керээ талазы-биле бир дугаар хүлээп ап турары бо. Оон аңгыда, Чонну ажылга хаара тудар төптүң специалистери ТШО киржикчилеринге болгаш оларның чоок кижилеринге ажылга тургустунарынга, немей өөредилге эртеринге, бодунуң хууда ажыл-агыйын ажыдарынга дузалажып, арга-сүмени каткан. Чөөн-Хемчик болгаш Мөңгүн-Тайга кожууннарның төлээлерин видеохарылзаа таварыштыр база дыңнааннар.
Шак мындыг хемчеглер күрүне фондузунуң баазазынга ай санында болуп эртерин күш-ажыл болгаш социал политика сайыды Эдуард Сандан демдеглээн:
“Социал керээ программазынга киришкен кижи бүрүзү деткимчени албан алыр ужурлуг. Кол-ла чүве документилерин шын болгаш четче чыып, төлевилелди эки камгалаары. Төлевилелдиң акша-хөреңгизин шын санап каары чугула. Ону санаар тускай дүрүмнер бар. Бистиң сорулгавыс өг-бүле боттарынга акша-хөреңгини ажылдап ап эгелээр кылдыр дузалажыры”.
Бир киржикчи хаваннар азыравышаан, ооң-биле чергелештир картофель тарыыр сорулгалыг. Ооң чугаалап турары-биле алырга, ол бичиизинден тура ук ажылды кылып чораан болгаш, кончуг эки билирин Эдуард Сандан эскерип чугаалаан. Бо угланыышкын кончуг орулгалыг болгаш ажыктыг ажыл дээрзи киржикчиниң тургускан төлевилелинден көскү.
Таңды кожуундан тускай шериг операциязының 2022–2023 чылдарның киржикчизи Элдев-Очур Оюн бызаалыг инектер садып алгаш, ооң сүдүнден ак чем аймаан кылып, болбаазыраткаш, садып-саарар сорулгалыг. Ол боду бичиизинден тура мал-маган аразынга өскен болгаш, шээр малды ажаап-карактап, ак чем аймаан кылып билир. Ук ажылды эгелээринге ол белеткенип, ооң мурнунда-ла хериминиң иштинде кажаа-хораазын тудуп белеткеп алган.
“Документилер чыып, төлевилел тургузары берге болду. Ынчалза-даа Таңды кожууннуң социал координатору меңээ дузалашканынга четтиргеним илереттим. Тускай шериг операциязының киржикчилерин мынчаар деткип турары өөрүнчүг-дүр. Улаштыр орулга киирип ажылдаары чүгле бистиң боттарывыстан хамааржыр” – деп, ол чугаалаан.
Тыва чон мал ажыл-агыйлыг болгаш, мал-маган саткаш, улаштыр ооң сүдүнден янзы-бүрү ак чем аймаан болбаазырадыр сорулгалыг киржикчилер хөй болган.
Комиссияның түңнелинде бизнес-планында акша-хөреңгини шын эвес санап кааны-биле 3 кижини эрттирбейн барган.
Ч. КАРА-САЛ.
Чуруктарны интернеттен алган.
“Шын” №76 2024 чылдың октябрь 5
Күрүне деткимчези
6 октября 2024
5