ТР-ниң Баштыңы тускай шериг операциязының киржикчилериниң өг-бүлелери-биле «Ада-чурт камгалакчылары» күрүне фондузунуң Тывада салбырынга ужурашкан.
Ужуражылгага чүгле найсылалдан аңгыда Чөөн-Хемчик, Чеди-Хөл, Улуг-Хем, Тожу болгаш Кызыл кожууннардан өг-бүлелер келген.
Тожу кожуундан Оюмаа Товут беш ажы-төлдү кижизидип чоруур. Ол школага башкылап турган. Кажан өөнүң ээзи ТШО-га киржип тургаш, ис чок чиде бээрге, ажылындан үнүп алгаш, уругларының ачазын дилээр, сураглаар ажылдарже шымны берген. Ынчангаш «Ада-чурт камгалакчылары» күрүне фондузунуң тус черде салбырының социал координатору кылдыр ажылдай берген.
Снежана Моңгуш ийи ажы-төлдүң авазы. Ол Кызыл хоорайда чурттап чоруур. Ооң көдүрүп турар айтырыы – адазын чидирген ажы-төлүнге психологтуг дуза чедирери. Владислав Ховалыг ук саналды деткип, ТР-ниң Өөредилге яамызынга даалганы бергеш, айтырыгны шиитпирлеп, өөренип көөрүн, психологтарның бо айтырыгга хамаарыштыр билиин бедидер курстарны организастаар даалганы берген.
Чүгле школачылар эвес, уруглар садтарында бичии чаштар база психологтуг дузаны хереглеп турар дээрзин ужуражылганың киржикчилери чугаалашкан.
Чадаана хоорайдан келген Уранзай Ооржак амдыызында ажылдавайн, ийи ажы-төлүн кижизидип олурар. Уранзай Ооржактың мергежили төөгү болгаш ниити билиглер башкызы деп билип алгаш, ТР-ниң Баштыңы чаа ажыттынар школаже ажылдаарын сүмелээн.
РФ-тиң Президентизи В.Путинниң үзел-бодалы-биле эгелээн «Өөредилге» национал төлевилелдиң деткимчези-биле Чадаана хоорайда 616 олуттуг чаа школа удавас ажыттынар дээрзин сагындыраал.
«Ада-чурт камгалакчылары» күрүне фондузунуң Тывада салбырының ажыл-чорудулгазын эки деп ТШО киржикчилериниң өг-бүлелери демдеглээн.
ТР-ниң Баштыңы Владислав Ховалыг-биле ужуражылга үезинде ажы-төл өөредилгезинге, чурттаар оран-сава тудар халас чер алырынга, чуртталга коммунал ачы-дузага чиигелделерге болгаш ТШО киржикчилерин мөңгежидер хемчеглер дугайында айтырыгларны көдүрген.
ТР-ниң парлалга албанының медээлеринден А.ОНДАР белеткээн.