Кырган клённуң будуунда чааскаанзыргай улуг бүрү халаңайнып турган. Ол сөөлгү күжү-биле туттунарын кызыдып турган. Ынчалза-даа үе манаар эвес, күс бодунуң эргезин ап, бар-ла дириг бойдусту удудуп эгелээн. Бойдустуң дүрүмү — шупту бүрүлер бүгү черни чымчак хевис кылдыр шуглаар ужурлуг.
Ынчалза-даа ол тускай бүрү болган. Ол өскелерге каттышпайн, чааскаан чоргаар астынмышаан, бүгү делегейни эргип, ырак чурттарже ужуга бээрин күзеп турган.
Күштүг хаттың сырынынга маадырывыс черже бөөлденип бадып эгелээн. Чөгел төнген муңгаргай хүннер ону манап турар. Күзелдер болгаш идегелдер байырлыг…
Бичии уруг дээрден бөөлденип баткан сөөлгү бүрүнү улуг сонуургал-биле эдертир көрүп турган. Карак чивеш аразында бүрү ооң холунда…
Имистелип өшкен от-көстүг күскү чечек ышкаш клён бүрүзү уругнуң столунда чыдар. А бичии кыс ырак черде ачазынга чагаа бижип турар.
Далайлар болгаш океаннар кежилдир ырак чуртче чагаа ужуптар. Чагаа хавында чуга саазында чагаа биле клён бүрүзүн ачазынга суп каан.
Клён бүрүзү хол-бут-даа чок болза, делегейни эргипкен.
“Шын” №68 2024 чылдың сентябрь 7