Май 1 байырлалынга тураскааткан «Күштүглерниң күштүү» долгандырыг хүреш Владимир Биче-оол аттыг стадионга болуп эрткен. Байырлалдың эң-не чараш оюну тыва хурештиң ажыдыышкынынга Тываның ат-алдарлыг болгаш чаа эгелеп чоруур 64 мөгези шөлче девип үнгеш, күжүн шенешкен.
Долгандырыг хүрештиң анаа хүрештен ылгалы болза, мөге бүрүзү 15 аңгы удурланыкчы-биле хүрежир. Анаа хүрешке алды-чеди салыгга хүрежир болза, а долгандырыг хүрешке он беш катап хүрешкен. «Күштүглерниң күштүү» деп спортчу хемчегни бо чылын дөрт дугаар эрттирип турары бо. Чылдан чылче тыва хүрештиң мөгейикчилери хемчегни улуг сонуургал-биле көөр дээш, республиканың ырак-чоок булуңнарындан кээп турар.
Байырлалдың хүрежинге ТР-ниң Чазааның Даргазының оралакчызы Виталий Бартына-Сады мөгелерге байыр чедирип келген.
«Россияның чемпионадынче Тывадан бүдүн команда чорупкан дээрге-ле, шак мындыг маргылдааларның ачызы деп бодаар мен. Чүге дээрге мындыг маргылдаалар спортчуларывысты белеткеп, дадыктырар. Ынчангаш байырлал таварыштыр мөгелерге күштүг болгаш дидим, чараш аргалар ажыглап хүрежирин күзээр-дир мен. Езулуг шыырак мөге «Күштүглерниң күштүү» деп атты алзын, тиилелгени чедип алзын деп йөрээдим».
Долгандырыг хүрештиң түңнелинде, шылгараан мөгелерни өртектиг белектер-биле шаңнап-мактаан.
Сүт-Хөл кожууннуң Хартыга мөгези Начын-Мерген Ооржак шүүлген. Ооң чаңгыс чер чурттуу Хартыга мөге Кайгал-оол Ондар үжүүрлешкен, ол-ла кожууннуң аныяк мөгези Түметей Ширижик үшкү черни алганнар. Чаа-Хөлдүң Начын мөгези Кежик Шыырап дөрткү, Өвүрнүң Начын мөгези Сайдаш Моңгуш бешки черни, Сүт-Хөлдүң аныяк мөгези Күнденсонам Ондар алдыгы черни, чедиги черни - Өвүрнүң могези Денис Седивес, сески, тоску, онгу черлерни – Улуг-Хемниң мөгелери Демир-Хая Самдан, Хүлер Түлүш болгаш Александр Доржу олар чаалап алган.
Бистиң корр.