«Шын» 12+

Күскү келдиртиишкин эгелээн

3 октября 2025
4

Октябрь 2-де Тыва Республиканың Шериг комиссариадынга ТР-ниң Чазааның Даргазының оралакчызы Айдыс Сынаа база Тываның шериг комиссары, подполковник Евгений Терехов журналистерге күскү келдиртиишкинге хамаарыштыр тодаргай тайылбырны берген.

«Хүндүлүг чаңгыс чер чурттугларым, РФ-тиң Президентизиниң Чарлыы-биле күскү келдиртиишкин октябрь 1-ден декабрь 3-ке чедир болур дугайында чарлык интернет порталында үнүп келген. ТР-ниң Баштыңының айтыышкыны-биле сентябрь 25-тен тура республиканың 19 муниципалдыг девискээринге шериг албан-хүлээлгезинге хамаарыштыр ажылдар чоруттунуп эгелээн. Эң-не кол чүүл – эмчи шинчилгезин эки эрттирери. Кадык камгалал яамызының дужаалы-биле эргежок чугула эмчи комиссиязының составы тургустунган. Ол республикавыстың шериг албан-хүлээлге эртер назылыг хамаатыларының шынарлыг эмчи шинчилгезин эртеринге чугула чүүл. Шериг чоруур оолдарны шинчиир эмчилер октябрьдан декабрь 15-ке чедир Кызыл хоорайга болгаш Кызыл кожуунга ажылдаар. Кожууннардан келгеш, эмчи комиссиязын эртер дээн хамаатыларга 70 ажыг олуттуг чыдар чер белен. Бир дугаар комиссия октябрь 24-те болур» – деп, Айдыс Сынаа дыңнаткан.
РФ-тиң Президентизиниң Чарлыы-биле октябрь 1-ден декабрь 31-ге чедир күскү келдиртиишкин чүгле Тываның эвес, а бүгү Россияның девискээринде эгелээн. Бо күзүн Тывадан шериг чоруур хамаатыларның саны 650 ажыг. Шериг чоруур хамаатыларның хар-назыны болгаш албан-хүлээлге эрттирер хуусаазы 12 ай хевээр, өскерлиишкин чок.
Шериг кампаниязының үезинде күрүне ачы-дуза порталын таварыштыр электроннуг болгаш саазын хевирниң келдириишкиннери албан-шериг хүлээлгезин күүседир назыны чеде берген оолдарга удавас чеде бээр. Шериг комиссариадының интернетте албан ёзузу-биле порталында шериг телефон дугаарларын айыткан. Шериг келдиртиишкининге хамаарышкан билдинмес чүүлдерни долгааш айтырып болур. Шериг албан-хүлээлгезин 12 ай дургузунда күүседип каапкан шериглерни хуусаазы доостурга, чурттап турар черинче чандырыптар дээрзин ТР-ниң шериг комиссары, подполковник Евгений Терехов чугаалаан.
РФ-тиң Чепсектиг күштериниң одуруунга хуусаалыг шериг албанын эрттирери-биле ээлчег ёзугаар 2025 чылдың октябрь 15-те үдээри планда көрдүнген. «Дорт телефон шугуму» ажылдап эгелээн.

Айдың ОНДАР.
Буян ООРЖАКТЫҢ тырттырган чуруу.

ШЫН Редакция