Аффирмация дээрге ыыткыр болгаш хөй катап чугаалап тургаш, кижи бодунуң хей-аъдын көдүрүп, сорук киирип алыры-биле белеткеп каан домактар. Ооң эки талала- ры – эки бодалдар тывылдырар, муңгак байдалдан үнеринге, салып алган сорулгазын чедип алырынга дузалажыр. Ону бодунга таарыштыр база чогаадып ап болур.
Аффирмациялар дээштиг болзун деп бодаар болза, дараазында чурум ёзугаар номчууру чугула:
Эптиг үени тып алыңар: доктаамал аффирмация номчуур кылдыр бодуңарга эптиг үени шилип алыңар. Чижээ, угааныңарны мөөңнеп алыры-биле, даң бажында оттуп келгеш азы удуур мурнунда үеде номчуп туруңар.
Чогумчалыг байдалды тургузуп алыңар: силерни кым-даа чардыктырбас оожум черден тып алыңар. Ол кым-даа кирбес, шыпшың өрээл азы агаар-бойдус болуп болур.
Сеткил-хөңнүңерни эки байдалга тудуп алыңар: аффирмацияны ыыткыр болгаш дидим чугаалап эгелеңер. Карааңар шийип алгаш, сөс бүрүзүн, шынап-ла, боттанып турар кылдыр сагыштаңар. Өөрүшкүнү, бодуңарга бүзүрелди болгаш оожургалды эскерип каар силер.
Бүзүрел-биле катаптаңар: аффирмацияны бир удаа 5–10-дан эвээш эвести катаптаңар. Хүн дургузунда ол сөстер силерге катап-катап сагындырар кылдыр, аффирмацияның сөстерин саазынга бижээш, көскү черге салып алыңар.
Чуртталгаңарның бир кезии кылып алгаш, ол сөстерни амыдыралыңарга боттандырыңар. Чижээ, мерген угаанныг апаар мен деп чугаалап тургаш, чаа чүүлдерни өөренип, өскелер-биле билиглериңерни үлежиңер.
Мындыг аффирмацияларны үргүлчү ажыглаарга, эки бодалдар көвүдээр болгаш аныяксыг, чараш болур.
1) “Күш-шыдалым долу, аныяк, мерген угаанныг мен. Хүннүң-не чуртталгамны өөрүшкү болгаш чаа билиглер-биле долдуруп турар мен. Бодумну кандыг бары-биле хүлээп ап, эрткен үеге өөрүп четтирип, келир үеже бүзүрелдии-биле көрүп турар мен. Мен чараш, мерген угаанныг болгаш чаа-чаа чүүлдерже оруум ажык”.
2) “Хүнден хүнче аныяксып, чараш болгаш угаанныг апарып бар-ла чыдыр мен. Чуртталгамда секунда бүрүзүн үнелеп чор мен. Чаартылгаларга үргүлчү белен мен”.
“Шын” №24 2025 чылдың июнь 26