Тыва Республиканың чогаалчылар эвилелиниң төлээлери Мария Күжүгет, Шончалай Мааты-оол Каа-Хем кожуунда чаа тургустунуп турар чечен чогаал каттыжыышкынының семинарынга киришкен.
Кожууннуң төп ном саңынга болуп эрткен семинарга чогаалга сонуургалдыглар чыглып келген. ТР-ниң улустуң чогаалчызы М. Күжүгет чечен чогаал каттыжыышкынының культурлуг амыдыралга ужур-дузазын республикада чедиишкинниг ажылдап чоруур «Мажалык» (Барыын-Хемчик), «Мөңгүлек» (Бай-Тайга) чечен чогаал каттыжыышкыннарының чижээнге, төөгүзүнге даянып тайылбырлаан.
Аныяк шүлүкчү Ш. Мааты-оол бодунуң чогаадыкчы намдарынга база чечен чогаал каттыжыышкынының салдарлыг болганын демдеглээн. Ол студент чылдарында «Сорунза» чечен чогаал каттыжыышкынының идепкейлиг киржикчизи турган.
«Каа-Хемниң хаяазы» деп чаа тургустунган каттыжыышкынның даргазынга ТР-ниң чогаалчылар эвилелиниң кежигүнү, шүлүкчү Юрий Даваа соңгуткан.
Ол бот-идепкейи-биле чогаалга сонуургалдыгларны чыып, чечен чогаал каттыжыышкынын тургузар ажылды шимчеткен. Каттыжыышкынның даңзызында 15 кижи бактаап кирген.
Каа-хемчилер бедик хей-аъттыг, улуг сонуургалдыг ажылдап эгелээн. Каа-Хем кожууннуң төп ном саңының ажылдакчылары бөлгүмчүлерни деткип, чырык, чылыг оран-савазынга кичээлдээр, хуралдаар өрээлди берип турары өөрүнчүг. Боттарының шүлүктерин номчуп, эки ажылдаарын дугуржуп, мурнунга сорулгаларын тодарадып алганнар.
Семинарга киржип келген, солун чугааны чоруткан, чагыг-сүмени берген аалчыларга четтиргенин илереткеннер.
«Каа-Хемниң хаяазының» оруу ак, хаяазы чырык-ла болзун!
Мария КҮЖҮГЕТ, ТР-ниң улустуң чогаалчызы.
Шончалай МААТЫ-ООЛДУҢ тырттырган чуруу.
“Шын” №98 2023 чылдың декабрь 23