«Кабачкиден оладьи»
Херек чемнер: кабачки, дагаа чуургазы, кургаг далган, суук үс, көк ногаа аймаа (укроп, петрушка), дус.
Соус: сметана, паприка, хоюг кара перец, дус – шуптузун холуй былгаар.
Оладьини кылыры: кабачкилерни чуггаш, картын картааш, үрезиннерин аштааш, дүрбүүшке хээр. Хээп каан кабачкини дузап кааш, дус сиңер кылдыр 5–7 хире минута тургузар. Дустуң немешкени-биле кабачкиниң суу үнүп эгелээр, ол үнүп келген суун төптер. Бир дагаа чуургазы биле көвей эвес далганны, ол ышкаш көк ногаа аймаан доорааш, кабачкиже холупкаш, шуптузун катай былгаар. Бир эвес суук апарган болза, бичии далгандан немеп ап болур. Сковороданы улуг эвес отка изиткеш, суук үске оладьилерни быжырар. Үстүнде айыттынган соус-биле холуп чиир.
«Кабачкиден дээрбектер»
Херек чемнер: кабачки, фарш, помидор, кадыг быштак, суук үс, дус, паприка, укроп.
Чемни кылыры: фаршты амдан киирер холумактар-биле болбаазырадыр. Кабачкилерни чуггаш, карты кылын болза, картап каапкаш, төгериктей кескеш, бичии дузап каар. Духовканың чем быжырар формазынга үстү чаггаш, кабачкилерни чада салгаш, кырынга фаршты опайтыр каар, ооң кырындан төгериктей кескен помидорларны салыр. 200 градус изиткен духовкага 40 хире минута дургузунда быжырар. Үези төнер чоокшулап турда, дүрбүүшке хээп каан кадыг быштакты немээр. Чемни эзип алгаш, укроп-биле чараштаар.
«Картошкалыг кабачки»
Херек чемнер: кабачки, картошка, болгар перец (аңгы-аңгы өңнүг кылдыр холуп ап болур), томат суу, согуна, чеснок, суук үс, дус, укроп, петрушка, хоюг кара перец.
Чемни кылыры: кабачки биле болгар перецти чуггаш, үрезиннеринден арыглааш, дөрбелчинней доораар, ол ышкаш согуна биле чеснокту бичииледир хээндектээш немээр, хоюг кара перецти холааш, бичии дузааш, холуштур былгаар. Картошканы чуп, картын картааш, база-ла дөрбелчинней доораар. Духовканың чем быжырар формазынга азы бичии-бичии дой саваларга баштай картошканы бичии дузааш каар, ооң кырындан белеткеп алган ногаа аймаан урупкаш, көвей эвес суук үс биле томат суун кудар. Саваларның аксын хаггаш, 200 градус изиг духовкага 50 хире минута дургузунда быжырар. Чем болу бээрге, укроп, петрушка ногааларны чараштап салыр. Бо чемни анаа бодун чип болур азы балык, эътке гарнир кылдыр база ажыглап болур.
Чем чиртингир болзун!
Чуруктарны интернеттен хоолгалаан
“Шын” №28 2025 чылдың июль 24