– Бажыӊым документизин кылдырар дээш, Росреестрже билдириишкинни кожууннуӊ ачы-дуза чедирер МФЦ төвүнден чоруткан мен. Оон бээр элээн үе эрте берген. Бажыӊ документизин ам Росреестрден алыр мен бе? Тодарадып айтырып бериӊерем, «ШЫН» солун.
Бай-Тайга кожууннуӊ чурттакчызы, «Шын» солуннуӊ номчукчузунуӊ айтырыынга харыылап бээрин Тыва Республикада Росреестр эргелелиниӊ Барыын килдизиниӊ эксперт специализи Айсула Олеговна Ооржактан дилээн бис.
– Бажыӊ, чер документилерин кылдырар талазы-биле Росреестрже билдириишкин киирген соонда, чогуур документини 45 хонук дургузунда кылып белеткээр. Билдириишкин дужааган черинге, ылавылаарга, МФЦ төвүнге 45 хонук соонда чеде бээрге, документилер аӊаа турар. Баргаш, чүгле ап алыр.
Ынчалза-даа чамдык улус боттарыныӊ кылдырып каан документилерин ол үезинде албайн баар апарган. Ээлери айтырып келбейн баарга, бажыӊныӊ, черниӊ кадастр учедунуӊ документилерин Тыва Республикада Росреестрниӊ федералдыг кадастр палатазыныӊ салбырынга шыгжаар.
Бир эвес документилериӊерни ол үезинде албаан болзуӊарза, Кызыл хоорай, Горная кудумчузу, бажыӊ 104 а деп адреске баар силер. Кадастр палатазыныӊ документилер хүлээр болгаш бээр офизиниӊ турар чери ол.
Шыгжаттынган документини ап чеде берген хүнүнде-ле кандыг-даа төлевир чокка ап бээр.
Оларны кайы-даа албан черинде шыгжап турар болза, ук документиниӊ чедип келгениниӊ дугайында дыӊнадыышкынны ол кижи алыр ужурлуг. Бир эвес Росреестрниӊ хандырылгазын экстратерриториалдыг принцип-биле, тодаргайлаарга, ол бажыӊныӊ турар кожуунунга кылдыртырын дилээн-даа болза, документизи чедип келген деп дыӊнадыышкынны халас алыр ужурлуг.
Бир эвес адрезин бижээш, курьер эккеп бээр деп чагыг киирген болза, ол хандырылга төлевирлиг болур. Курьерниӊ ханыдырылгазы Ада-чурттуӊ Улуг дайыныныӊ хоочуннарынга, инвалидтеринге, I-ги бөлүктүӊ чажындан тура инвалидинге, инвалид уругларга, I-ги, II-ги бөлүктүӊ инвалидтеринге халас болур.
Кылдырып каан документилерин ачы-дуза чедирер МФЦ төвүнден айтырып болур-даа болза, документилерни чүгле Кадастр палатазындан алыр.
Бир эвес боду эвес, а бүзүрелдиг төлээзи документилерни алыр дээр болза, чогуур чурум ёзугаар нотариуска бадыткадып алганы бүзүрел шынзылга бижиин (доверенность) көргүзер.
Билдириишкиннерниӊ үлегер-майыын Росреестрниӊ болгаш Федералдыг кадастр палатазыныӊ сайтыларында «Банк документов» деп кезектен көрүп болур.
Республиканыӊ чурттакчылары Кадастр палатазыныӊ телефон дугаарынче: 8(394-22)2-37-49; 8(394-22)5-64-62 долгааш, ээлериниӊ албаан документилерин кайда шыгжап турарыныӊ, оларны кайы үеге чедир ап болурунуӊ дугайында тодаргай медээлерни билип ап болур.