Тываның Баштыңы Владислав Ховалыг «ДОМ.РФ» күрүне корпорациязының төлээлери-биле Тываның Чазаанга ужурашкан. Чурттуң Президентизи Владимир Путинниң деткимчези-биле "Банк ДОМ.РФ" күрүне корпорациязының структурлуг салбыры регионда катап эгелээни чиигелделиг ипотека чээлизиниң программазында бо чылдың марттан эгелеп киржип турар. Республиканың социал-экономиктиг хөгжүлдезиниң адырынга үр үе дургузунда кады ажылдаарының аргаларын ийи тала чугаалашкан.
Ужуражылгага «Красноярск» немелде салбыр офизиниң удуртукчузу Полина Медведева база ол-ла албан чериниң биче болгаш ортумак сайгарлыкчы чорук талазы-биле удуртукчузу Елена Шпак киришкен. “Банк ДОМ.РФ” акционерлиг ниитилелдиң төлээлери регионга ажыглап болур ажылының угланыышкыннарының, коммерция продуктуларының дугайында чугаалаан.
ДОМ.РФ банкызы 1997 чылдан бээр ипотека чээлизин болгаш тудуг организацияларын акшаландырып, чуртталга тудуунуң адырын сайзырадып турар. Оон аңгыда банк кижилерге болгаш юридиктиг черлерге, бизнеске болгаш инвесторларга банкының бодунуң калбак хевирлерин саналдап турар. Ол ышкаш банкының регионнар хөгжүлдезиниң талазы-биле аңгы программалары бар.
Чугаа үезинде регионга сонуурганчыг угланыышкыннарже кичээнгейни ийи тала угландырган: ДОМ.РФ банкының чиигелделиг ипотека чээлизиниң программазын, тускай техника садып алырынга лизинг негелделерин, туризм адырынга чээли бээриниң дээш оон-даа өске чүүлдерге улаштыр киржир.
"Бистиң республикага кончуг чугула коммунал болгаш орук-тудуг, ол ышкаш көдээ ажыл-агый техниказын садып алыр дээш чиигелделиг лизингиниң программаларын көөр бис. Культурлуг өнчү-салгал объектилерин эде чаартыр ажылдар улуг сонуургалды оттурган. Оон аңгыда туризмни хөгжүдеринге идиг бээр программалар бар" – деп, республиканың Баштыңы ужуражылга соонда бодунуң блогунда демдеглээн.
Владислав Ховалыг бодунуң оралакчыларынга болгаш яамылар удуртукчуларынга “Банк ДОМ.РФ” акционерлиг ниитилелдиң саналдарын аңгы-аңгы адырларга ажыглаар кылдыр таныжар даалганы берген.
Бистиң корр.
А. ЁНЗАКТЫҢ тырттырган чуруу.
“Шын” №31 2025 чылдың август 14