Кады ажылдажылганы делгемчидер

Тыва Республиканың Чазаа биле Кыдат Улус Республиканың Синьцзян-Уйгур автономнуг районнуң чазааның аразынга кады ажылдажылга дугайында дугуржулганың чаарттынган планын видеохарылзаа хевирге ийи таланың ужуражыышкын соонда бадылап, кады ажылдажылгага беленин илереткен.

Ужуражылгага Тываның Баштыңы Владислав Ховалыг, Чазак даргазының оралакчызының албан-хүлээлгезин күүседип турар Владимир Донских, орук-транспорт сайыды Шораан Чыргал-оол, Туризм талазы-биле агентилелдиң директору Ай-Хаан Догур-оол, Кызыл хоорайның мэри Карим Сагаан-оол киришкен.

Күрүне кызыгаарында “Хандагайты – Боршоо” автомобиль болгаш Кызыл хоорайның аэропортунда агаар транспортунуң эрттирилге пунктуларын чаартып, оларны ажыткан соонда Синьцзян-Уйгур автономнуг район биле Тываның аразынга кады ажылдажылганың чаа аргалары улам алгыыр дээрзин Владислав Ховалыг демдеглээн.
Тыва Республиканың Чазаа биле Кыдат Улус Республиканың Синьцзян-Уйгур автономнуг районнуң чазааның аразынга кады ажылдажылга дугайында дугуржулганы 2019 чылда-ла чарган, ынчалза-даа политиктиг чылдагааннар уржуунда ону боттандырып четтикпээн. Ийи регионнуң аразынга харылзааларга кыдат эрге-чагырга политиктиг хамаарылганы кошкадырга, кады ажылдажылганы катап эгелээр арга тургустунган.

Кыдаттың Синьцзян-Уйгур автономнуг район биле Тываның аразында дугуржулганы боттандырар дээш, республика улуг күжениишкинниг ажылдаар деп Владислав Ховалыг бодунуң блогунга бижээн.