Бөгүн, апрель 17-де, ТР-ниң Культура яамызынга Күжүгет Шойгу аттыг Культурлуг фондунуң баштаар чери биле ТР-ниң Культура яамызының кады ажылдажылга дугайында Дугуржулгага албан ёзу-биле ат салыр хемчег болган.
Хемчегниң эгезинде Тываның улустуң хөөмейжизи Евгений Сарыглар игилге тааланчыг аялганы ойнап, чыылганнарга хөөн киирген соонда, ат салыр ёзулал эгелээн.
Ийи таланың кады ажыл-чорудулгазынга чугула документиге Фондунуң баштаар чериниң даргазы Ирина Шойгу биле ТР-ниң культура сайыды Виктор Чигжит аттарын салган.
Дугуржулгада аттарны чаа салып турар-даа болза, херек кырында Тываның культуразының хөгжүлдезинде көскү исти арттырган Күжүгет Шойгу аттыг Культурлуг фонду биле Тываның Культура яамызы сөөлгү каш чылдарда улуг хемчээлдиг элээн хөй ажылдарны кылып чоруткан: ”Тубтен Шедруб Линг” сарыг шажын хүрээзин ажыткан; Каа-Хем биле Бии-Хемниң белдиринде Будда башкының тураскаалын тургускан; дош хоорайжыгаш ажыдыышкыны; "Өскүс-оол дугайында тоолга" үндезилээн мюзиклге либретто бижииринге К.С. Шойгу аттыг Культура фондузунуң грантызы-биле мөөрейни эрттиргеш, тиилекчилерин илереткеш, чалаткан режиссерлар-биле удавас мюзиклди В.Көк-оол аттыг Национал театрга тургузуп эгелээр деп турар. Оон аңгыда, «Традиционная медицина и духовные практики в современном мире: тенденции и перспективы развития” деп делегей чергелиг эртем-практиктиг конференцияны эрттирген.
Болган хемчегге Ирина Шойгу сөс алгаш:
— Бөгүн кады ажылдажылганың Дугуржулгазында ат салып турарывыс дээрге, анаа барымдааны демдеглеп турарывыс-тыр. Херек кырында, шагда-ла кады кылып чоруткан ажылдарывыс эвээш эвес. Ол ажылдар чылдан чылче улам калбарып бар чыдар. Ам-даа ажылывыс уламчылап, эгелеп алган төлевилелдеривисти эчизинге чедир боттандырар бис. Оларның бирээзи – Өскүс-оол дугайында тоолга үндезилээн бир дугаар тыва мюзикл. Бо дыка онзагай төлевилел чүве. Шак ындыг национал мюзикл өске чаңгыс-даа регионда чок. Оон аңгыда, бистиң Фонд “Урянхай. Тыва дептер” деп антологияга үндезилээн школачылар аразынга республика чергелиг мөөрейни эрттирерин планнап турар бис. Бо мөөрейниң кол сорулгазы – школачыларның төөгү дугайында билиин быжыглаары. Мөөрейни ТАР-ның эки тура-биле РСФСР-ниң составынче киргенинден бээр 80 чыл оюнга болгаш Пандито Камбы-ламаның институдунуң тургустунганындан бээр 105 чылдаанынга тураскаадып эрттирер деп турар бис.Черле ынчаш, бистиң Фондунуң ады-ла чугаалап турар, культура адырын деткиири — фондунуң кылып чорудар ажылывыстың кол угланыышкыны-ла ол” – деп чугаалаан.
Бодунуң ээлчээнде, ТР-ниң культура сайыды Виктор Чигжит Ирина Күжүгетовнага баштаткан Фонду Тываның культуразының хөгжүлдезинде канчаар-даа аажок улуг үлүг-хуузун киирип турар деп үнелээш, республиканың бүгү культура албан черлериниң удуртукчуларының мурнундан, яамының мурнундан чылдан чылче көргүзүп турар деткимчези дээш Ирина Шойгуга өөрүп четтиргенин илереткен. Төөгүлүг хемчегде киржип келген Тываның культура албан черлериниң удуртукчуларынга ат салган ийи таланың кады ажылдажылгазынга шупту киржилгелиг болур дээрзин сайыт демдеглээн.
К. МОНГУШ.
Буян ООРЖАКТЫҢ тырттырган чуруктары.