Тываның Баштыңы Владислав Ховалыгның удуртулгазы-биле неделяның бир дугаар хүнүнде эрткен Аппарат хуралында республиканың Чазаа биле Дээди Хурал (парламент) кады ажылдажылга дугайында дугуржулганы чарганнар. Аңаа регионнуң удуртукчузу биле парламентиниң спикери Каң-оол Даваа аттарны салган.
Ук дугуржулга эрге-чагырга органнарының удур-дедир ажылдажылгазын экижидип, хоойлу чогаадылга ажыл-чорудулгазын сайзыраңгайжыдарынга чугула документ апаарын Владислав Ховалыг бодунуң блогунда демдеглээн. Регионнуң социал-экономиктиг хөгжүлдезинче угланган төлевилелдерни тургузарынга, хоойлу төлевилелдерин ажылдап кылырынга, информация солчулгазынга идепкейлиг кады ажылдажылганы бээр ужурлуг.
2024 чылдың сентябрьда соңгуткан Дээди Хуралдың чаа составында аңгы-аңгы партияларның («Чаңгыс демниг Россия», КПРФ, ЛДПР база «Чаа кижилер») төлээлери кирген болгаш, ооң бодалы-биле үре-түңнелдиг ажылдаарынга үндезин барын Тываның Баштыңы сагындырган.
Парламентиниң спикери Каң-оол Даваа, бодунуң ээлчээнде, дугуржулга эрге-чагырга органнарының аразында кады ажылдажылганы быжыглап, регионнуң чугула айтырыгларын дээштиг шиитпирлээринге дузалаар дээн бүзүрелин илереткен. Республиканы хөгжүдеринге идиг бээр документ үр хуусаада база тургузукчу кады ажылдажылгага үндезин болурун ол демдеглээн.
Январь 23-те, бо четвергте, Тываның Баштыңы Владислав Ховалыг депутаттар мурнунга чылдың Айыткалын бээр. Ол эрткен чылдың түңнелдерин үндүрүп, 2025 чылда мурнады боттандырар угланыышкыннарны айтыр. «ВКонтакте» социал четкиде регионнуң Баштыңының албан езунуң арнындан хемчегниң дорт дамчыдылгазын көрүп болур.
ТР-ниң Чазааның парлалга албаны.
“Шын” №2 2025 чылдың январь 23