Кады демниг ажылдаар

Тыва Республиканың Баштыңы Владислав Ховалыг Кыдат Улус Республиканың Иркутск хоорайда чиңгине консулу дээрги Ли Хай-биле апрель 20-де ужурашкан. Тываның Чазааның бажыңынга болган ажылчын ужуражыышкынга Россия Федерациязының Даштыкы херектер яамызының Красноярск хоорайда төлээзи Артем Захаров, Кыдат Улус Республиканың Иркутск хоорайда чиңгине консул чериниң консул-атташези дээрги Саяо Шуай, Тыва Республиканың Чазааның Даргазының бирги оралакчызы Владимир Донских дээш Чазактың өске-даа кежигүннери киришкеннер.

Тываның Баштыңы Владислав Ховалыг дээрги Ли Хай-биле амыр-менди солушкаш, ооң тыва черге аалдап келгенинге өөрүшкүзүн илередип, бо ужуражылга Россия Федерациязының составында Тыва Республика биле Кыдат Улус Республиканың аразында экономиктиг болгаш культурлуг харылзааларны улам быжыктырарынга дыка салдарлыг болурун, тыва-кыдат экономиктиг кады ажылдажылганың таваа Тывада шагда-ла салдынганын демдеглээш, ооң чижээ кылдыр Тожу кожуунда ажылдап турар “Лунсин” даг-руда компаниязын адаан. Россия биле Кыдаттың регионнарының аразында социал-экономиктиг болгаш культурлуг харылзааларының сайзыраанын Владислав Ховалыг чугаалааш, Тываны алыр болза, олар элээн шуудаанын айыткан.

Тываның Баштыңы Владислав Ховалыг биле Кыдаттың Иркутск хоорайда чиңгине консулу дээрги Ли Хай бодалдар, саналдар солушкан соонда, бистиң республиканың инвестициялыг күчү-шыдалының болгаш ооң Россия Федерациязының составында Тыва Республика биле Кыдат Улус Республиканың аразында экономиктиг харылзааларны хөгжүдеринге кандыг ужур-дузалыг болурунуң дугайында дыңнадыгны ТР-ниң Чазааның Даргазының бирги оралакчызы Владимир Донских кылган.

Российжи-кыдат политиктиг болгаш экономиктиг харылзааларның быжыгып турары-биле холбаштыр “Курагино – Кызыл” демир-орук шугумунуң ужур-дузазы бедээнин, ону чурттар аразының демир-оруу чергелиг кылдыр тударының бүгү барымдаалары барын, Владимир Донских чугаалааш, Тываны тавартыр Россия – Моол – Кыдат транспорт коридорун тургузар шиитпирни федералдыг деңнелге хүлээп алырын чедип алыр дээш, Тываның Баштыңы Владислав Ховалыг биле ооң командазы күжениишкинниг ажылдап турарын демдеглээн.

Кыдат даг-руда компаниялары-биле кады болбаазырадып болур казымал байлактар чыдыннары, туризмни чедиишкинниг сайзырадырынга таарымчалыг агаар-бойдузундан аңгыда, Тываның эм-таң шынарларлыг аржааннарынга, дустуг хөлдеринге санатор-курорт инфраструктураларын кыдат тала-биле кады тургузуп болурунче кичээнгейни Владимир Донских угландырган. Чедер биле Дус-Хөл дээш республиканың өске-даа дустуг хөлдери шынар талазы-биле Израильде Өлүг далайның эм-таң шынары ышкаш деп сайыт тайылбырлаан.

Тываның инвестициялыг күчү-шыдалы ооң онзагай агаар-бойдузундан-на илдең-дир деп дээрги чиңгине консул Ли Хай демдеглээш, российжи-кыдат харылзааларны бүгү талазы-биле хөгжүдер сорулганы Кыдаттың Коммунистиг партиязының чиңгине секретары болгаш Кыдат Улус Республиканың Даргазы Си Цзиньпин биле Россияның Президентизи Владимир Путин олар салган чүве болганда, улам сырый демниг ажылдаары чугула-дыр деп чугаалаан.

Ужуражылганың төнчүзүнде Тываның Баштыңы Владислав Ховалыг биле Кыдаттың Иркутск хоорайда чиңгине консулу дээрги Ли Хай удур-дедир белектер солушканнар. Кыдат таладан эң үнелиг белек Владимир Путинниң өңнүү Си Цзиньпинниң номнары болган.

/ Шаңгыр-оол МОҢГУШ.
Буян ООРЖАКТЫҢ тырттырган чуруу.

"Шын" №29 2023 чылдың апрель 22