«Шын» − Тыва Республиканың кол эртинези. «Шын» солун дээрге арыг тыва дылга үнүп турар массалыг информацияның дириг чепсээ. Чоннуң ынак солунунга үнүп келген Улу чылында хөй-хөй чагыкчыларлыг болурун күзээр-дир мен.
«Шын» солун − чоннуң индири, тыва дылдың хүндүткелдиг болгаш үнелиг кол кадагалакчызы, камгалакчызы, суртаалчызы. Чаа үндүрүлгезин номчувайн баарымга, сагыжымда бир-ле чүве четпейн турар ышкаш болур. «Шын» − мээң деткикчим, чогаадыкчы сүмелекчим, чонум-биле харылзаам. «Шын» солун редакциязының коллективи мени деткип, шаңнап-мактап чоруурунга өөрүп четтиргеним илередир-дир мен.
Эгииреде эжим болган
Эгелекчи сүмелекчи,
Четтикпейн манааш, номчуур
Чечен сөстүг «Шын» солун.
Аныяамдан амга чедир
Адырылбас номчуп чоруур,
Амыдырал айтыкчызы
Ачы-буянныг «Шын» солун.
Холдан салбайн номчуп орар,
Хоочун солун «Шыным» сеңээ
Четтиргеним илередип,
Деткип, йөрээп чор мен.
Номчуулуңар! Угаан кирер.
Номчуулуңар! Билиг бедиир.
Номчулга – эртемче орук.
Чылбак МОНГУШ,
Маадыр ие, күш-ажылдың болгаш херээженнер шимчээшкининиң хоочуну, РФ-тиң хүндүлүг башкызы.
“Шын” №29 2024 чылдың апрель 17