Декабрь 3 — Бүгү-делегейниң инвалидтер хүнү
Декабрь 3-те, Бүгү-делегейниң инвалидтер хүнүнде, Россияның караа көрбестер ниитилелиниң Тывада регионалдыг салбыры байырлыг хуралды организастаан. Аңаа Кызыл хоорайның болгаш республиканың аңгы-аңгы кожууннарындан караа көрбес хамаатылар болгаш ТР-ниң Дээди Хуралының депутаттары Калбак Долаан, Анджела Канчыыр-оол, Росси Күжүгет, Айдана Шивит-Хуурак база Культура, Күш-ажыл болгаш социал политика, Кадык камгалал яамыларның төлээлери киришкен.
Россияның караа көрбестер ниитилелиниң Тывада регионалдыг салбырының даргазы Аңгыр Хертек баштаан ниитилелдиң кежигүннери аалчыларын уткуп хүлээп алган.
Байырлыг хуралды ук ниитилелдиң кежигүнү Анатолий Моңгуштуң 1970 чылдарда бижээни «Борбак-Арыг» деп ырызы-биле ажыткан. Караа көрбестер ниитилелиниң кежигүннериниң ансамбли чонга бараалгаан.
ТР-ниң караа көрбестер ниитилелинде ниитизи-биле 700–800 хире, а Кызыл хоорайда 300 хире караа көрбес инвалидтер бар. Караа көрбестер ниитилелиниң Россияга тургустунгандан бээр 100 чыл, Тывага тургустунгандан бээр 65 чыл оюн 2025 чылда демдеглээр, а клуб таптыг-ла 50 чыл бурунгаар үндезилеттинген. Караа көрбестер ниитилелинге келир чыл үш дакпыр юбилейлиг чыл болур.
Байырлыг хурал болур бетинде херээжен улус аразынга күжүн шенежир мөөрей болган. Карааның көөрү багай 12 киржикчиниң аразындан Таңды кожууннуң Сосновка сумузунуң төлээзи Чодураа Тюлюш тиилээш, 2 муң акша шаңналды алган.
«Бичиимде кадыкшылым эки турган. Шору апарганымда, бир караам аарып эгелээш, хенертен көөрү баксырай берген. Ынчангаш 2-ги бөлүктүң инвалиди апарган мен. Бо байырлалга 10 ажыг чыл киржип тур мен. Чылдың-на чалаптарга, чедип кээр-дир мен. Күжүн шенежир оюнга ойнааш-ла, 1, 2 дугаар чер алыр-дыр мен. Биске шак мындыг хемчеглер эрттирип берип турары дээш өөрүп четтиргенимни илередир-дир мен. Мында чыглып келген эш-өөрге кадыкшылды күзедим.
Кадык болуру дег чугула чүве чок. Ылаңгыя бичии уруглар караан камнап чорууру күзенчиг. Чаш кижини орун-дөжектен аңдарып болбас. Бичии турда, билдинмейн барза-даа, улгадырга, карак-кулаанга-даа багай салдарлыг бооп болур. Ынчангаш бичии чаштарны эки хайгаараары чугула.
Баштай чаңгыс караам аарый берген. Эмнээшкин соонда кадык караамче халдай берген. Таптыг камнанмайн, кадыг ажылдар кылыпканым ол, кадык караам база аарый берген. Чоорту бир караамның көөрү шуут баксыраан. Чүгле чаңгызы-биле бүлүртүң көрүп чоруур мен» – деп, Чодураа Тюлюш чугаалады. Ол өг-бүлелиг. Үш кызының бирээзи Томск хоорайда студент, а ийи бичиилери школачылар.
Байырлалга келген аалчылар хүндүлел бижиктерни, байыр чедириишкиннерин тыпсып, өртектиг белектерни сөңнеп, чылыг-чымчак сөстер-биле чыылганнарны йөрээген. Байырлал оюн-тоглаа-биле уламчылаан.
Айдың ОНДАР.
Буян ООРЖАКТЫҢ тырттырган чуруу.
«Шын» №93 2024 чылдың декабрь 4