Бичии уругларның диштеринге кариестиң тыптып кээр чылдагааны иези иштиг үезинде шын эвес чемненип турганындан деп, эртемденнер тодараткан.
Организмге кальцийниң чедишпези иезиниң-даа, чаш төлүнүң-даа диштеринге хоралыг болур. Иениң хырын иштинде төлү 5–7 неделя турда дижээр диштери хевирлеттинип эгелээр, а 16 неделязында доктаамал диштери сайзырап эгелээр. Чаш төл төрүттүнүп кээрде 20 база 4 дазыл диштер боттанган боор. Хырын иштинде чаш төлдүң, оон төрүттүнүп-даа кээрге сайзыраарынга иезиниң шын эвес чемненилгези, витаминнер чедишпези, сагышсыраары, авазының аарыглары улуг салдарлыг болур.
Амгы үениң аъш-чеминде хөй-ле консервантылар болгаш чем солуур холуксаалар бар. Ынчангаш чаш төлүнге минералдар чедер кылдыр, чип турар чеминиң тургузуун эки хайгаараар болза эки.
Уругнуң диштери кадык болзун деп бодаар болза, чүнү кылза экил?
Сааттыг херээжен кижи даштыгаа хүннүң агаарлаар, чемненилгезин шын сагыыр.
Чижээ Са (сүттүг чемнер), D (далай продуктулары, чуургалар), F (грек тоорук, овсянка, ногаан шай, ногаа) витаминнерлиг аъш-чем чиир.
Ооң-биле чергелештир организм эки шиңгээдип алыр кылдыр минералдар аразында харылзаалыг болурун өөренип көөр.
Ижин иштинге 6 айлыг турда уругнуң дазыл диштери хевирлеттинип эгелээр. Ынчангаш чамдыкта авазының чеминге Са биле F витаминни немээри негеттинип кээр.
Ынчангаш келир үеде ие болур кыс кижи, ылаңгыя чоок дөргүл-төрелдериниң аразында диштериниң хевири, хемчээли азы туружу шын эвес кижи бар болза, медико-генетиктиг консультацияны эртип алыры артык эвес.
Чурукту интернеттен алган.
«Шын» №16 2025 чылдың май 1