Эрткен чылын кадык камгалалынче 11 млрд ажыг рубльди угландырган. «Кадык камгалал» национал төлевилел ёзугаар 10 автотранспорт, 124 бедик технологиялыг эмнелге дериг-херекселдери садып алдынган, 6 чаа объект туттунган: 3 ФАП-ты болгаш 3 эмчи амбулаториязын ажыглалче киирген. Республиканың 1 дугаар эмнелгезиниң поликлиниказының, Сүт-Хөл болгаш Чеди-Хөл кожууннарның төп эмнелгелериниң, Чөөн-Хемчик кожууннуң кожууннар аразының медицина төвүнүң оран-саваларынга капитал септелгелерни кылган. 21 медицина комплекизин саткан. Уруглар эмнелгезиниң, туберкулёзка удур эмнелгениң, онкодиспансерниң чаа оран-саваларын тудар төлевилелдерни ажылдап кылып турар. 1 дугаар республика эмнелгезинде чаа салбырлар база ажыттынган. Бедик технологиялыг эмчи дузазын чедирери көвүдеп турар
Эмчи кадрларны деткиири-биле республика бюджединден чангыс удаа бээр компенсастыг 1 сая рубль хемчээлдиг төлевир болгаш 5 чыл дургузунда 200 муң рубльду төлеп турар. Тывадан дашкаар ажылдап чорупкан эмчилерниң дедир чанып кээри-биле улуг ажыл чоруттунуп турар. Ооң ачызында 2022 чылда республикаже 89 эмчи эглип келген.