Свекла кижиниң организминге, ылаңгыя улуг назылыгларга дыка ажыктыг. Ооң составында бар хөй нитраттар чүректиң ажылдаарынга дузалаар. Дамырларны алгыдар шынарлыг болгаш, хан базыышкынын өйлээр. Ол ышкаш свеклада клетчатка база органиктиг кислоталар бар, ынчангаш тырыктаар улуска бо үнүштү диетологтар сүмелээр. Ылаңгыя улуг назылыг улустуң аъш-чеминге үргүлчү ажыглаарын сүмелеп турар.
Свекла-биле кылыры эң-не белен болгаш чаагай салатты сүмелээр-дир бис.
Херек чүүлдер: 400 г свекла, 200 г борбак согуна, 3 улуг шопулак ишти ногаан горошек, хендир үзү, амдан киирер укроп, петрушка, дус, перец.
Кылыры: Свекланы хайындыргаш, аштааш, дөрбелчинней доораар. Согунаны база дөрбелчинней доорааш, сковородкага хендир үзү-биле саргартыр хаарар.
Согуналыг свекланың кырынче ногаан горошекти немээш, бичииледир хээп каан петрушка, укропту, оон амдан киир дус биле перецти каар. Бо бүгүнү согуна хаарып турган үзүнге холуй былгааш, чараш тавакка ногаа-биле каастааш, салыр.
Чем чиртингир болзун!
Чурукту интернеттен хоолгалаан.
«Шын» №20 от 2025 чылдың май 29