Республиканың хөй-ниити кадыкшылга болгаш эмчи профилактика төвүнүң ажылдакчылары “Амыдыралче 10000 базымнар” деп бүгү-российжи акцияны Аныяктар хүнүнге тураскаадып Дөгээ дааның баарынга эрттирген.
Амыдыралдың үнелиг кадык овур-хевирин суртаалдап, чурттакчы чоннуң күш-культуржу шимчээшкинин бедидип, кадыкшылганың бөдүүн арга-хевирлерин нептередири – акцияның сорулгазы. 2015 чылдан бээр бүгү-российжи акция чурттуң аңгы-аңгы шөлчүгештеринде эрттирип турар. Россия Федерациязының 700 ажыг чурттакчылыг черлеринден миллион ажыг кижи чылдың-на акцияга киржири чаңчыл апарган.
Кижи кезээде шимчениишкинге чоруур дизе, хүнде-ле 6 муңдан 10 муң базымны кылган турур ужурлуг дээн Бүгү-делегейниң кадык камгалал организациязының сүмези езугаар, “Амыдыралче 10000 базымнар” деп акция эртип турар.
Хөй-ниити кадыкшылга төвүнүң ажылдакчылары даг эдээнге хан базыышкынын хемчээр булуңну организастаан. Акцияның киржкичилеринге болгаш кызылчыларга шын чемненириниң болгаш кадыкшыл талазы-биле арга-сүмелерлиг буклеттерни үлээн.
Ук хемчегге назы-хар дивейн, хөй кижилер киришкен. Акцияның киржикчизиниң спортчу болуру албан эвес, а арыг агаарга селгүүстеп алыр дээш, аңаа-ла чедип келири кол турган. Ол эптиг арганы 175 кижи ажыглап, кадыкшылын быжыглаан 10 муңдан-даа хөй базымны Дөгээ даанче кылган.