Кижиниң кадыкшылы – үнелеп четпес эртине. Ынчалза-даа ону хумагалап, камнап билбезивистиң уржуу-биле янзы-бүрү аарыглардан качыгдап, кадыкшылывыска эгиттинмес когаралды чедирип турар бис. Бо удаада диспансеризация деп чүл база ооң кол сорулгазының дугайында сагындырып бижиир-дир бис.
Россияның хамаатылары диспансеризацияны эртип турарын дыңнап, номчуп турарыңар чугаажок. Бистиң чурттакчы чонувустуң аарып-аржып турарының, инвалид байдалга чедип база өлүп-хорап турарының кол чылдагааннары болуп турар аарыгларны эге чадазында илередип, чогуур эмнээшкинни чорудары – диспансеризацияның кол сорулгазы. Ол дээрге чүрек-дамыр системазының, иштики бестер, айыылдыг ыжык аарыглары. Кысказы-биле чугаалаар болза, диспансеризация дээрге аарыгларны эрте илередип тывары, ооң дузазы-биле эмчилер па- циентини чугула «херекселдер», билиглер-биле чепсеглеп турар.
Чыл санында диспансеризацияны эртер улус аңгы: 18 хардан өрү улуг кижи бүрүзү үш чылда бир катап чурум езугаар көрдүнген эмчи шинчилгелерин бүрүнү-биле эртер эргелиг.
Диспансеризацияны кижи бүрүзү бодунуң чурттап турар черинде поликлиникаларга эртип алыр аргалыг: кожууннарның чурттакчылары төп кожуун эмнелгезиниң поликлиника салбырынга, Кызылдың чурттакчылары хоорай поликлиникаларынга. Силерниң участогуңар эмчизи азы эмчи сестразы, бир болза эмнелгениң регистратуразының ажылдакчызы диспансеризацияны каяа, канчаар эртерин, кайы кабинетче баштай кирерин тодаргайы-биле тайылбырлап бээр.
Диспансеризация үезинде эртер шинчилелдер, дужаар анализтер халас болур, чүгле эмчи камгаладылгазының полизин көргүзери албан. Диспансеризация эрткен хамаатының кадыкшыл байдалының дугайында бүгү медээлерни «Кадыкшыл паспортунче» киир бижиир болгаш ук паспорт дараазында диспансеризацияга чедир силерниң холуңарга артар.
Кадыкшылды үе-шаанда хынап, аарыгларны баш бурунгаар болдурбазы-биле, диспансеризацияны эртип алырынче номчукчуларны кыйгырып тур бис!
/ Орлана АЙМАА, Республиканың аарыгларга удур кадыкшылга төвүнүң терапевт эмчизи.
"Шын" №40 2023 чылдың июнь 3
Кадыыңар дээш сагыш човап, диспансеризацияны эртип алыңар
4 июня 2023
50