"Херел" спорт залынга декабрь 14-те инвалидтер декадазынга тураскааткан дыңнаары кошкак эр спортчулар аразынга республиканың 4 дугаар хостуг хүреш чемпионады болуп эрткен. Маргылдаага кожууннардан база өөредилге албан черлеринден 14 команда, ниитизи-биле 56 мөге 2025 чылда Россия чемпионадынга хүрежир эрге дээш киришкеннер.
Чемпионаттың ажыдыышкынынга ТР-ниң Спорт яамызының, Спортчу маргылдаалар эрттирер эргелелдиң, Республиканың Кадыкшыл байдалынга таарыштырган хевирлерниң спорт школазының база Спортчу хүрештер чөвүлелиниң төлээлери киришкен. Дээди Хуралдың депутады, ЦСКА–Тыва спорт школазының директору Буян Биче-оол сөс алгаш, спортчуларга байырлалын таварыштыр байырын чедирбишаан, быжыг кадыкшылды база бедик спортчу чедиишкиннерни күзээн.
Түңнел оюннарга тулган тиилекчи ат дээш мөгелер чидиг демиселин көргүскеннер. Баштай эң чиик 52 килдиг мөгелер аразынга Кызылдың дыңнаары кошкак уругларның школа интернадындан Начын Кара-Сал биле Доржу Түлүш эжишкилер таварышканнар. Түңнелинде, Начын Кара-Сал сан талазы-биле ашкаш, чемпион атка төлептиг болган. Дараазында 57 килге Тываның политехниктиг техникумунуң сургуулдары Чечен Шан-оол эжи Амилат Салчакты октааш, тиилекчи болган. Улаштыр хевис кырынга 61 килдиң мөгелери — Олимпийжи курлавырлар училищезиниң сургуулу Доржу Монгуш чараш хүрешти көргүзүп, школа интернаттан Аюш Лопсан-Комбуну ойнааш, 1-ги черни алган. Эң шыырак 65 килдиг мөгелерге Чеди-Хөлден Гун-Чин Оюн школа интернаттан Начын Чыпсынакты октааш, тиилекчи болган. Ортумак 70 килдиг мөгелерге Республиканың Кадыкшыл байдалынга таарыштырган хевирлерниң спорт школазының, Россияның призеру Кирил Багай-оол Кызылдың төлээзи Күдер Картини бүзүрелдии-биле ойнааш, чемпион болган. Дараазында 74 килге ТывКУ-нуң студентилери Экер Сат биле Юлиан Монгуш хүрешкеннер. Түңнелинде, Россияның 2 дакпыр чемпиону Экер Сат чииги-биле тиилээш, 1-ги черже үнген. Аар 79 килдиг мөгелер аразынга ТывКУ-нуң студентизи, Россияның призеру Байыр Ондар Республиканың Кадыкшыл байдалынга таарыштырган хевирлерниң спорт школазындан Аржаан Ооржакты тиилээш, чемпион атка төлептиг болган. Эң аар 79 килден өрү килдиг мөгелер аразынга Эрзинден Владимир Калгахөө Сүт-Хөлдүң мөгези Айдаш Монгушту тиилээш, 1-ги черни алган.
Тускай шаңналдарны дараазында мөгелер алган: эң бичии, салымныг мөге деп атка Аюш Лопсан-Комбу, тиилелгеже чүткүл дээш Саймир Монгуш, эң чараш хүреш дээш Чечен Шан-оол.
Алексей ЧАМБАЛ-ООЛ, спортуң хоочуну.
“Шын” №97 2024 чылдың декабрь 18