Каш чыл дургузунда ажылы ара соксаан турган Күрүнениң автоинспекциязының кожууннарда доскуул черлерин Тыва Республиканың Баштыңы Владислав Ховалыгның даалгазы-биле катап тургузуп эгелээн.
Оларның бирээзи Чадаанада КАИ-ниң доскуул чери 8 чыл дургузунда хагдынган турган. Барыын кожууннарже углаан чоннуң чоон оруунда турар доскуул черин катап септеп кылырынче Чөөн-Хемчик кожуун чагыргазы 300 муң рубльди үндүргеш, соңгаларын, эжиктерин шуптузун солааш, ишти-даштын бүрүнү-биле септээш, 3 фазалыг электри шугумун киирген соонда, май 17-ден эгелеп доктаамал ажылдап эгелээн.
Ол доскуул черинге КАИ ажылдакчыларындан аңгыда, суд приставтары, үндүрүг инспекциязының специалистери неделяда чаңгыс удаа үнүүшкүннүг ажылдаар.
Россияның ИХЯ-ның Тывада “Чөөн-Хемчик” кожууннар аразының полиция начальниги, капитан Саян Саттың харыылап турар девискээринге Мөңгүн-Тайга, Өвүр, Сүт-Хөл болгаш Чөөн-Хемчик кожууннар хамааржыр.
– КАИ постузунуң бир дугаар ажылдап эгелээн хүнүнде чүгле дүъшке чедир 50 автомашинаны доскаш, хынаан. Түңнелинде, 20-зи орук шимчээшкининге хажыдыышкынны кылганы илерээн, үндүрүг инспекторлары өрелиг чолаачылардан 10 муң рубльди ол-ла черге тырткаш, төлеткен. Суд приставтары өрелиг 15 ажыг чолаачыларны тодараткаш, бежинге эт-хөреңги хоругдалын онааган. Чоорту бо доскуул черинге видеокамераларны салырын база планнап турар бис. Шак мындыг доскуул черлери орук шимчээшкининге баш бурунгаар айыыл чок чорукту хандырарынга улуг ужур-дузалыг – деп, полицияның капитаны дыңнаткан.
Өске чылдарда кожууннарга ажылдап турган доскуул черлерин дүжүреринге Россияның иштики херектер органнарынга ниити реформаның эгелээни чылдагаан болган. Эгезинден тура доскуул черлерин хаарынга Тываның Чазаа удур турган. Чазак Даргазы айтырыгны иштики херектер сайыдының деңнелинге көдүргеш, доскуул черлериниң ажылын катап эгелээрин чедип алган. Ол хүн доскуул черлериниң бирээзи ажылын эгелей бергенинге өөрүп, ам-на орук шимчээшкини чурумчуур дээрзин Владислав Ховалыг дыңнаткан.
– Шупту билир-ле болгай бис, эзирик байдалга чораан чолаачының буруузу-биле хөй орук озал-ондаа болуп турар. Шак мындыг постулар чер-черлерге доктаамал ажылдап эгелээр болза, байдал оожургаар, чолаачыларның харыысалгалыг болгаш серемчилелдиг болурунга улуг салдарлыг болур – деп, Владислав Ховалыг чугаалаан.
Ол хүн барыын кожууннарже ажылчы сургакчылаашкын үезинде Чазак Даргазы Ак-Туругда доскуул черин база хынап четкен. Ында септелге ажылдары кидин түлүк чоруп турарын көрген. Май айның төнчүзүнге чедир Тес-Хемде, Чаа-Хөлде КАИ-ниң доскуул черлери септелге ажылдарын дооскаш, бо чылдың июнь 1-ден эгелеп шупту шыңгыы ажылдап эгелээри манаттынып турар.
/ Карина МОНГУШ.
Начын АҢГЫР-ООЛДУҢ тырттырган чуруктары.
"Шын" №36 2023 чылдың май 20