«Азия төвү” скульптурлуг комплекстиң девискээри онзагай болгаш улуг болуушкуннарның эртер чери болу берген. Тыва улустуң национал байырлалы Наадым бо чылын Азияның төвүнден эгелээн деп болур. Бөгүн мында тус черниң сайгарлыкчыларының бүдүрген барааннарының, республиканың ус-шевер салым-чаяанныг кижилериниң кылган чүүлдериниң ярмарка-делгелгези болуп турар.
Алдын-мөңгүн нарын каасталгалар, чараштыр кылган согааш, деспи, чүген-чулар, янзы-бүрү дүрзү-хевирлиг, өңнүг саваңнар дээш кандыг чүүлдү ында чок дээр! Лариса Шалык төрүмелинден-не ус-шевер салым-чаяанныг болган. Күрүне ажылынга чардыккаш, чүгле хостуг үезинде узанып чораан. Сөөлгү ийи чыл дургузунда ус-шевер чоруунче бүрүнү-биле кирипкен, эр, херээжен улустуң каасталгаларын чагыг ёзугаар кылып турар. Ол ийи чыл дургузунда республика болгаш российжи чергелиг делгелгелерге ажылдарын киириштирген. 2022 чылдың декабрь айда Москвага “Ладья” делгелгеге ажылдарын салгаш, эки үнелелди алган.
“Эврика” немелде өөредилге төвүнүң башкызы Валентина Соловьева чараштыр даараан орус, тыва ойнаар-кыстарны болгаш өске-даа ойнаарактарны ярмарка-делгелгеге салган. Ойнаар-кыстарны кижилер күзелдии-биле садып ап турган.
Саваңдан кылган янзы-бүрү белек ойнаарактарны, янзы-бүрү дүрзүлерни Ксения Сокол ярмаркага делгээн. Ооң бараанын чон хөйнү садып алган. Чүүл бүрү дүрзүлерлиг белек саваңнарны Ксения чүгле чагыг ёзугаар кылып турар. Ооң бараанын хереглээннер эвээш эвес.
Тус черниң бараан бүдүрүкчүлериниң продукциязының ярмарка-делгелгези чүгле садыг-наймаа эвес, Наадым-23-түң баштайгы хүнүнүң каасталгазы болган. Бичии уругларның болгаш бот-тывынгыр артистерниң ыр-шоору чаңгыланып, танцы-самы диңмиреп турган.
Бистиң корр.