Камгалал үлептүр комплекизиниӊ бүдүрүлгелери-биле кады ажылдажылга айтырыгларын РФ-тиӊ Президентизиниӊ СФО-да бүрүн эргелиг тѳлээзи сайгарып чугаалашкан.
Россия Федерациязыныӊ Сибирь федералдыг округта бүрүн эргелиг тѳлээзи Анатолий Серышев Новосибирскиде «Электроннуг херекселдерниӊ эртем-шинчилел институдунга» барып чораан. Ук акционерлиг ниитилел «Ростех» күркорпорацияныӊ «Технодинамика» холдингизиниӊ эргелелинге хамааржыр.
Бүдүрүлге ажылыныӊ чугула айтырыгларын, ооӊ иштинде бүдүрүлгени чаартырын база күрүнениӊ камгалал чагыгларын күүседирин ужуражылга үезинде ооӊ удуртулгазы-биле сайгарып чугаалашкан дээрзин РФ-тиӊ Президентизиниӊ бүрүн эргелиг тѳлээ чериниӊ парлалга албаны дыӊнаткан.
Камгалал үлетпүр комплекизиниӊ бүдүрүлгезиниӊ үзүк-соксаал чок чурумнуг ажылдаары дээрге Россияныӊ айыыл чок болурунуӊ барымдаазы болур дээрзинге Анатолий Серышев бүзүреп турар. Күрүнениӊ камгалал чагыгларын күүседириниӊ демниг ажылы-биле холбашкан айтырыгларны бүрүн эргелиг тѳлээ боду доктаамал контрольга алган. Ооӊ бодалы-биле алырга, күрүнениӊ камгаланыр сүр күжүн быжыглаарынга эртем-шинчилел институттары онза черни ээлеп турар. Олар чаартыкчы инновация аргалары-биле продукцияларны чогаадып кылгаш, бүдүрүп үндүрүп турар.
Кадрлар-биле хандырары база күш-ажылдыӊ бүдүрүкчүлүүн бедидери ужуражылганыӊ аӊгы темазы болган. Бо айтырыгны ооӊ мурнунда бүрүн эргелиг тѳлээ чериниӊ удуртулгазыныӊ хуралдарынга сайгарып турган. Күш-ажылдыӊ бүдүрүкчүлүүн бедидериниӊ бир аргазы дээрге бүдүрүлгени чаартыры-дыр. Бүдүрүлге чери шак ол сорулгалыг ажылды системалыг шиитпирлеп турар дээрзин бүрүн эргелиг тѳлээге, лабораторияларны болгаш цехтерни кѳргүзүп турган үеде, тайылбырлаан.
Тывада амгы үеде «Ростех» күркорпорацияныӊ ийи компаниязы ажылдап турар. Үлетпүрге ажыглаар частыр чүүлдерниӊ бир кезээн «Техмашсервис» бүдүрүп үндүрүп турар, а «Эльбрусметалл-Литий» деп компания ажылыныӊ эге чадазын күүседип кирипкен. Кызылга ук бүдүрүлге черин 2023 чылдыӊ август айда үндүрүг тѳлекчизи кылдыр бүрүткээн.
Бистиң корр.
“Шын” №87 2024 чылдың ноябрь 13