Харамай күркамгалал чериниң бажы каткан суртаалчызының аайынга киргеш, озал-ондактан бодун камгаладып алган. Алыс бодунуң үнген уксаазының ханында чүгле аптар чүвениң дүлгээзинниг хайы сиңген болгаш, Харамай база бээр черинде эвес кижи дээр-ле болгай. Ынчангаш чуртташтары ону Кыдат деп шолалаарында ужур-ла бар болбайн аан. Чогум ооң ажылдап ап турар акша-шалыңы хөй дижир. Ол хирезинде ырымы багайы аттыг: кеткен хеви өң чок, оңуп калган чоруур, кожаларындан үргүлчү хлеб, чигир диленир. Назы-хары дөртен чоокшулаза-даа, кадай безин албаан. Бодавыже, аңаа артык хырын херек чок турган боор оң.
Бир эртен Харамай ажылынче далажып бар чыда, бусталып чыткан өл инек-мыяанга тайгаш, черге чыткан ыргак демир кырынга кээп ушкаш, кырызын сып алган. Ажыл чок ийи ай иштинде гипс сөөртүп келгеш, күркамгалал черинден элээн көвей акша алгаш, өөрээнин чүү дээр. Бир эвес оң холу бертинген болза, оон-даа хөй акша алыр дугайында демги-ле суртаалчыдан билип алган.
Каш хонганда ол оң холунуң кырызын кара өжегерээн сый шаап алгаш, уё-човуурлуг кезер эмчиге чеде берген. ... Бөрттүг бажың кескеш, октавыт дээр болза, Харамай канчаар ирги? Аа богда, халый берзе хөңнү-ле эвеспе, Харамайың ол хире бар-дыр ийин.
Василий ХОМУШКУ.
“Шын” №37 2026 чылдың сентябрь 24
"Шын" солуннуң МАХ-каналынга каттыжыңар: max.ru/channel_shyn