2025 чылда аас-кежиктиг болгаш чедиишкиннерлиг болур дизе, чамдык дүрүмнерни сагыыры чугула деп астрологтар санап турар. Чаа чылды уткуурда, кандыг өңнүг хепче кичээнгейни угландырарын көрээлиңер:
Овеннер биле Адыгжыларга кып-кызыл, кызыл-сарыг болгаш от өңнүг каас идик-хеп шилип алырын астрологтар сүмелеп турар. Аңаа немей улуг хемчээлдиг каасталгалар, көскү макияж болгаш маникюр база артык эвес. Чидиг өңнер оларга күш бээр.
Бугалар биле Кысчыгаштарга оът, оливки база хүрең өңнүң шупту янзызы — сүттүг шоколадтан чемгир кофеге чедир өңнер тааржыр. Бо өңнер кижиге таарымчалыг амыдыралды болгаш сагыш-сеткилге күштү хайырлаар. Илби-шиди ылап бүтсүн дээр болза, каас хевинге аргалыг-ла болза, алдын каасталгаларны кедер.
Фисташка болгаш чырык хүрең өңнерни база бичежек, шевергин аксессуарларны Рактаргаболгаш Деңзилерге сүмелеп турар. Шак-ла ындыг өңнер оожургалды болгаш таарымчалыг амыдыралды сөңнээр.
Арзылаңнар биле Ийистер, хүрең-кызыл болгаш алдын өңнерге шилилгени кылыңар. Ынчан сылдыстар силерни ылап сактып алыр болгаш чаа чылдың бирги үш айында-ла саң-хөө байдалыңар экижиир.
Бир-ле онзагай, солун кезектерлиг чидиг көк-ногаан өңнерге аяннашкак каас хепти Скорпионнарбиле Водолейлер дидими-биле шилип ап болур. Чижээлээрге, бир-ле тускай моюндуруктуг азы эдектиг азы өттүр көстүп турар кожундактыг платьелер. Ындыг арга чаа 2025 чылда аас-кежикти болгаш чедиишкинни магадылап турар.
Козерогтар биле Балыктарга долгандыр бүгү-ле чүүлдерге таарымчалыг байдалды тудары-биле, ак өңнүг хеп кедерин сылдыстар сүмелеп турар. Ак өңнүг хепти өңгүр идик азы аксессуарлар улам аян киирер.
“Шын” № 98 2024 чылдың декабрь 21