Карактыг кижи көрүп, кулактыг кижи дыңнап каар

Кызыл хоорайда Орус культура төвүнге ТР-ниң Чазааның ажыл-чорудулгазының отчеттуг хуралы болуп эрткен. Аңаа республиканың чуртталга-коммунал ажыл-агый, кадык камгалалы, культура, спорт адырларының ажылдакчылары киришкен. ТР-ниң Чазааның 2022 чылда кылып чоруткан ажылдарының үре-түңнелдериниң видео көргүзүүн чыылган чонга таныштырган.

ТР-ниң садыг-саарылга адырында керээ системазын өйлээр сайыттың хүлээлгезин түр үеде күүседип турар Чечек Ооржак, агро бүдүрүлге комплекизиниң килдис эргелекчизи Светлана Донгак, кадык камгалалының сайыдының бирги оралакчызы Марьяна Куулар олар хуралды удуртуп эрттирген.

Илеткелдер соонда чоннуң сонуургаан айтырыгларынга тускай специалистер чогуур харыыларны берген. Чижээлээрге, эмчилерге, башкыларга, журналистерге дээш өске-даа күрүне ажылдакчыларынга чурттаар оран-сава айтырыын шиитпирлежири-биле бажың тудуп алыр чер айтырыын болгаш Кызыл хоорайга туттунуп эгелээн микрорайоннардан чиигелделиг ипотека дугайында чугаалашкан.
Ниитизи-биле, Тываның Чазааның 2022 чылда кылган ажылдарын «Карактыг кижи көрүп, кулактыг кижи дыңнап каар» чогуур деңнелде, эки деп чыылган чон үнелээн.

Росси Күжүгет, Тываның чүрек-дамыр аарыгларын кезип эмнээр эмчизи:
— 2022 чылда Тываның Чазаан дыка эки ажылдаан деп санап тур мен. Хоорайывыс каракка көзүлдүр-ле чаарттынып, чаа бажыңнар немежип-ле олур. Кызагдаашкыннар бар-даа болза, республикавыс бодунуң шаанче хөгжүп олурар.
Кадык камгалалында-даа чаа чүүлдер көвүдээн. Чижээлээрге, чаа үениң дериг-херекселдери немешкен. Республикавыска чаа аппараттар ам-даа херек. Чоокку үелерде боттаны бээр дээрзинге бүзүрээр мен. Чүгле чаа аппараттар эвес, суурларда эмнелге пунктулары база туттунган. Ниитизи-биле черле 2022 чылда чедиишкиннер хөй болган.

Наталья Попугалова, Кызыл хоорай чагырыкчызының социал политика талазы-биле оралакчызы:
— Мээң, Кызыл хоорайның чурттакчызының, чагырга чериниң ажылдакчызының көрүжү-биле алырга, Тываның Чазаа 2022 чылда бедик деңнелге ажылдаан. Республикавыска чаңгыс чылдың дургузунда дыка хөй ажылдар кылдынган. Ылаңгыя регионнуң социал адырынга хамаарыштыр хөй ажылдар кылдынганы илдең. Школалар, уруглар садтары дээн ышкаш социал объектилерниң тудуглары туттунган. Амгы үеде Кызыл хоорайда дөрт школа тудуу эгелей берген дээрге-ле, дыка хөйнү чугаалап турары ол. Ол дээрге өөредилгеге хамаарыштыр ханы болгаш делгем уткалыг шиитпирлерни хүлээп алганының херечизи болуп турар. Республиканы хөгжүдер дизе, бир-ле дугаарында, уруглар садтарын, школаларны, өске-даа өөредилге черлерин чаартыры, уругларга өөрениринге эптиг байдалдарны тургузары болгай. Кажан өөредилге адырынга эптиг байдалдар турда, сайзырал чылып орар.

Культура одагларының тудуглары — чоннуң культуразын хөгжүдеринге чугула. Республикада ниитизи-биле каш культура одаан септээнин, каш чаа бажыңны тутканын чон билир. Кадык камгалалынга хамаарыштыр дыка хөй чаартылгалар болганын шупту көрүп турар бис. Амгы үениң чаа дериг-херекселдери безин чеже немежи берди. «Эзирлер уязы» губернатор төлевилели база 2022 чылда дыка эки ажылдаан. Ол дээрге спорттуң хөгжүлдезиниң демдээ-дир.

/ А. ОНДАР.