Эрткен неделяда социал четкилерге болгаш мессенджерлерге Нарын суурда бода мал холера аарыындан аарааш, чудап өлген болгаш ооң чылдагааны-биле Төре-Хөл девискээринде карантин чарлаттынган деп меге медээ тарай берген.
Ооң-биле холбаштыр Тываның ветеринария албанының специалистери Төре-Хөл болгаш Нарын суурнуң девискээринде бода мал аарыы-биле холбашкан карантин чарлаттынмаанын, ол дугайында медээ меге дээрзин тайылбырлаан.
«Бода малдың холера аарыы» деп тодарадыг чок. Кызыгаар чоогунда кожууннарның мал-маганы хөй кезиинде часкы үеде хоолулуг мал чеми чедишпезинден чудап өлүп турар» — деп, көдээ ажыл-агый яамызының специалистери демдеглээн.
Ол ышкаш садыглардан эът, сүт аймаа садып албас болза эки дээн чижектиг медээлер бадыткал чок болуп турар. Эът, сүт аймаа садыг-саарылгаже мал эмчилериниң санитарлыг хыналдазын дамчып эртер.
Ындыг турбуже, Бүгү-делегейниң дириг амытаннарының кадыын камгалаар организацияның дыңнадып турары-биле алырга, Моолда азырал дириг амытаннар аразында ящур, чума аарыглары болгаш чыпшынчак кеш аарыы тодараттынган. Тываның болгаш Россияның мал-маганынга ол халдавырлыг аарыглар айыылды тургузуп турар.
Ынчалза-даа бөгүн Тываның ветеринария албаны Дириг амытаннарның кадыын камгалаар федералдыг төптүң эртемденнери-биле ук байдалды холга ап, чогуур хемчеглерни чорудуп турар. Кызыгаарда чыдар кожууннарда азырал дириг амытаннарның кадыын баш бурунгаар камгалаар хемчеглерни, ооң иштинде массалыг тарылганы (ревакцинация) чорудуп турар.
Көдээ ажыл-агый яамызының медээзинден.