Дүжүт ажаалдазы
Байлак хөрзүннүг Бии-Хем кожууннуң хову-шөлдеринге бо чылын картофель болгаш ногаа аймааның дүжүдү чаагай болган. Төрээн чериниң сөңнээни дүжүдүнүң байырлалдарын бии-хемчилер эрттирип, оран-таңдызынга чалбарып, бедик дүжүттү күзүн ажаап алыр дээш, эрткен чайын кызымак ажылдаан ишчилерни алгап-мактап турарлар.
Эрткен дыштанылга хүннеринде Хадың суурга картофель дүжүдүн Бии-Хемниң ногаажылары байырлап эрттиргеннер. Боттарының ажаап өстүргени ногаа аймаан делгелгеге көргүзер, чонга садарындан аңгыда, эң улуг болгаш аар деңзилиг картофель мөөрейин эрттирген. 2024 чылда эң улуг болгаш аар деңзилиг картофельди Тарлаг сумунуң чурттакчызы Сайлык Моңгуш ажаап өстүрген. Ооң картофелиниң деңзизи 1 килограмм 760 грамм болган. Бии-Хеминиң эң улуг картофелиниң ээзи Сайлык Сарыг-ооловнаны Хадың сумунуң чагыргазы телевизор-биле шаңнаан.
Картофельден белеткээн аъш-чем аймааның делгелгезин база эрттирген. Эң-не амданныг, эң-не чараш дээш элээн каш хевирге картофельден кылган чемнерни бедик мергежилдиг ногаажылар болгаш поварлардан тургустунган тускай жюри үнелеп көрген.
«Картофельден кылган онзагай блюдо» номинацияга Аржаан сумудан М.М. Моңгуш, «Онзагай хевирниң картофели» номинацияга Хадың сумудан Н.Н. Оруспай тиилекчилер деп үнелеткеннер. «Хөглүг картошка» деп уран чүүл мөөрейинга Хадың сумудан А.Е. Даржаа тиилекчи болган.
Бии-Хем кожуунга чылдың-на картофель байырлалын эрттирип турарында ханы утка бар. 1941–1945 чылдарда Ада-чурттуң Улуг дайынының чылдарында картофельдиң ачы-буянының ачызында база аш-чутту тус черниң чону шыдажып эрткен.
Ш. Моңгуш белеткээн.
Чурукту интернет четкизинден хоолгалаан.
“Шын” №77 от 2024 чылдың октябрь 9