Тывага май 12-ден 14-ке чедир ТР-ниң Культура яамызы болгаш Тываның Камбы-лама эргелелиниң, Чогаадыкчы үлетпүрлер школазы болгаш “Улан УФК " регионалдыг хөй-ниити организациязының деткимчези-биле II-ги Делегей чергелиг сарыг шажын кинофестивалы болуп эрткен. Аңаа Россияның 28 регионундан болгаш делегейниң 6 күрүнези киришкен.
Каш хонук дургузунда фестиваль киржикчилери ниитизи-биле 34 фильмни көрген. Тывадан бо удаада фестивальга 10 фильмни киириштирген.
Оон аңгыда Делегей чергелиг “Хөөмей” академиязының баазазында ажыттынган Чогаадыкчы үлетпүрлер школазынга семинарлар болгаш мастер-класстарны российжи режиссерлар эрттирген. Фестивальдың хемчеглериниң аразында бир солун болган чүүл, бир дугаар профессионал тыва оператор Шамиль Седен-оолдуң 75 чыл оюнга тураскааткан “Хайыракан — ыдык даг”, "Зона затопления" деп тырттырган фильмнерин көрүкчүлер улуг сонуургал-биле көрген.
Үш хонук дургузунда болган кинофестивальдың Гран-при шаңналынга Казахстандан режиссерлар Мухамед Мамырбеков биле Азиза Заированың “Авай, мен дириг мен” деп ажылы төлептиг болган. А Марий Эл Республикадан Андрей Огородниковтуң "Евсеев. Признания ценою в жизнь" деп кинозу “Эң дээре барымдаалыг фильм” деп үнелелди алган. Ол ышкаш фестивальдың өске-даа шаңналдыг черлеринге дараазында фильмнер төлептиг болган:
“Эң дээре кыска фильм” номинацияга – «Девочка и улитка» (режиссер Хэльга Эфре, Россия, Санкт-Петербург);
“Камбы-лама эргелелиниң жюризиниң шиитпири-биле эң дээре фильм” номинация-га – «Королевство потерянных языков» (режиссер Дмитрий Беляев, Мария Шоклева, Россия, Чуваш Республика);
“Камбы-лама эргелелиниң жюризиниң шиитпири-биле эң дээре кыска фильм” номинацияга – «Что случилось?» (режиссер Шини, Россия, Тыва Республика);
“Эң дээре сарыг шажын дугайында барымдаалыг фильм” номинацияга – «Океан, ярмо и черепаха» (режиссер Владимир Асмирко, Россия, Москва);
“Эң дээре режиссура” номинацияга – «Гильза» фильмниң режиссёру Динара Абдрашитова, Россия, Башкортостан Республика);
“Эң дээре оператор” номинацияга – «Капкан» деп фильмниң оператору Виктор Крылов (Россия, Москва);
“Эң дээре актёр” номинацияга – Баир Ходжиев («Заметки Манджика. На краю степи» фильм, Россия, Калмык Республика);
“Эң дээре актриса” номинацияга – Марьям Ибрагимова («Фарида» фильм Россия, Азербайджан);
“Эң дээре хөгжүм” номинацияга – «Конгурей» фильм (композитор Алексей Ховалыг, режиссер Андрей Томашевский, Россия, Москва) тиилекчи болган.
Фестивальдың дараазында тускай шаңналдарынга:
“Эң дээре көрүштүг шиитпир” — «Конгурей» фильм (режиссер Андрей
Томашевский, Россия, Москва);
“Тускай чогаадыкчы туруш” — «Хомустуң кыйгызы» фильм (режиссер Алик Тюлюш, Россия, Тыва Республика) шаңнаткан.
Бистиң корр.
"Шын" №35 2023 чылдың май 17