«Биргилерниң шимчээшкини» деп Россияда ажы-төлдүң база аныяктарның хөй-ниити агымының кежигүннери республиканың кожууннарынга «Кажык» маргылдаазын организастаан.
Кожуунга тергиидээннер Кызылга келгеш, маргылдааның республика чергезинге күжүн шенешкеннер.
«Кажык» мөөрейге Мөңгүн-Тайгадан, Өвүрден, Улуг-Хемден, Чаа-Хөлден, Сүт-Хөлден дээш ниитизи-биле 15 команда киржип келген.
Мөөрейни аңгы-аңгы хевирлерге эрттирген: «Бодалажыыры», «Аът чарыштырары», «Сагалап ойнаары», «Кажык адары».
Тываның сураглыг артистери, үндезин езу-чаңчылдарның кадагалакчылары Шолбан Ондар, Адыгжы Монгуш болгаш Орлан Сат мөөрейниң шииткекчилери болган.
Тыва оюнга оолдар, уруглар аразында адааннажып, аажок хөглүг мөөрейлешкен.
Тыва үндезин культура төвүнүң медээлеринден.