Тываның күрүне университединиң юридиктиг факультеди Тээлиниң В.Б. Кара-Сал аттыг школазының 20 өөреникчизинге «ажык эжиктер» хүнүн эрттирген.
Кеземче хоойлу-дүрүмү болгаш ажыл-чорудулга кафедразының доцентизи Азияна Монгуш ТывКУ-нуң шериг өөредилге төвүн таныштырып, юридиктиг факультеттиң эртем ажылының дугайында өөреникчилерге чугаалап берген. Ийиги курстуң студентилери Мерген Саая, Цэрин Доптан, Ангелина Сандан-оол, Шончалай Кол база Жасмин Оюн школачыларга студент амыдыралды таныштырбышаан, юридиктиг факультетке экскурсияны чоруткан.
Уруглар криминалистика лабораториязын эң-не сонуургааннар. Студентилер школачыларга истелге хемчеглеринге ажыглаар тускай техниктиг херекселдерни көргүзүп таныштырган.
«Езулуг шын херекселдерлиг истекчиниң чемоданын чуртталгамда бир дугаар көрүп тур мен. Мурнунда ону чүгле киноларга кижи көөр болгай. А маңаа шупту шын перчаткилер, чугай, пинцеттер, плёнка, харын-даа дактилоскоптуг порошоктар база химиктиг реактивтерни көрдүм» — деп, Бай-Тайгадан келген школачы магадап чугаалаан.
Оон аңгыда, студентилерниң «Фемида» дээр эртем бөлгүмүнүң кежигүннери Цэрин Доптан биле Ангелина Сандан-оол «Хоойлу-дүрүм знатоктары» деп викторинаны эрттирген. Аңаа тергиидээн өөреникчилерни дипломнар болгаш чигирзиг белектер-биле шаңнаан.
“Шын” № 86 2023 чылдың ноябрь 11