Шагаан-Арыг хоорайның Саян-Шушенск кудумчузунда хөй аал чурттаар каът бажыңнарны 1987 чылда туткан. Ол үеден бээр капиталдыг септелгени 2020 чылда чоруткан-даа болза, чылыг бээр батареяларны чаартпаан.
Эрткен кыжын үстүнде адаанывыс кудумчуда 8 дугаар бажыңның чурттакчылары доңуп турарын хоорай чагыргазынга дыңнаткан. Ооң соонда ТР-ниң Чазак Даргазы Владислав Ховалыгның деткимчези-биле республика бюджединден 700 муң рубльди аңгылааш, 156 батареяны саткан дугайында Шагаан-Арыг хоорай чагырыкчызы Леонид Домур-оол дыңнаткан:
Бо хүнде Саян-Шушенск кудумчузунда хөй аал чурттаар каът бажыңның 4 дугаар подъездизинде чылыг бээр батареяларны солуур ажылдар уламчылап турар. Ниитизи-биле 156 чаа батареяларның 60-нын салган. Бо талазы-биле ажылды одалга сезону эгелевээнде доозар – деп, хоорайның чагырыкчызы чугаалады.
Дыштаныр хүн чок чоннуң оран-савазынга чылыг бээр батареяларны чаартып бээри-биле ТЭК-4 БК-ның каңнакчызы Ай-Херел Балчый-оол ажылдап турар:
– ТЭК-4 БК-да дөрт чыл дургузунда каңнакчылап ажылдап турар мен. Бо бажыңның 4 дугаар подъездизинде 20 квартираның 12-зинде чаа батареяларны салдым. Акша-шалың төлевири ажырбас. Бир батарея дээш бажыңның чурттакчылары 1 муң рубльди төлеп турар. Ам-даа ажыл хөй. Одалга сезону эгелевээнде, батареялар солуур ажылды доозар ужурлуг мен. Келир кыжын бо бажыңның чурттакчылары доңмас – деп, дуржулгалыг каңнакчы чугаалады.
К. МОНГУШ.
Буян ООРЖАКТЫҢ тырттырган чуруктары.
«Шын» №68 2023 чылдың сентябрь 13