Декабрь 12-де Россия Федерациязының Конституция хүнүнде улусчу дружиналарның киржикчилеринге шаңналдар тыпсыр байырлыг хурал болуп эрткен.
ТР-ниң Чазааның Даргазының оралакчызының хүлээлгезин күүседип турар Айдыс Сынаа регионнуң аңгы-аңгы булуңнарындан келген хамаатыларга байыр чедиргеш, республика девискээринге корум-чурум тудар ажылдарга база хөй-ниитиниң амыдыралынга идепкейлиг киржип чорууру дээш өөрүп четтиргенин илереткен. Улусчу дружиналар чүгле сумулар иштинге эвес, а кызыгаар черлерниң чурумун тударынга база улуг үлүг-хуузун киириштирип чоруур.
ТР-ниң Чазааның Даргазының орлакчызының хүлээлгезин күүседип турар Айдыс Сынааның демдеглээни-биле алырга, сөөлгү 11 ай дургузунда чепсектиг күштерниң кожууннарда салбырларының ажылдакчылары-биле улусчу дружинаның киржикчилери катчып алгаш, кем-херек үүлгедир чорукту 16,8 хуу эвээжеткен.
«Тус черлерде хүн бүрүде кылып чорудуп турар ажылыңар ниитилелдиң бурунгаар хөгжүлдезинге, корум-чурумнуң экижииринге, кем-херек үүлгедиглерин чавырылдырарынга кончуг улуг рольду ойнап турар. Бо ажылдар ам-даа уламчылаар дээрзинге идегеп тур мен. Чүге дээрге келир үевис бистиң демниг ажылдаарывыстан кончуг хамаарылгалыг болгай» – деп, Айдыс Сынаа чугаалаан.
РФ-тиң Айыыл чок чоруунуң федералдыг албан чериниң Кызыгаар талазы-биле эргелелиниң төлээзи Александр Буланкин кызыгаарда турар сумуларда чурттап турар улусчу дружиналар кежигүннериниң дузалыын демдеглээш, өөрүп четтириишкинниң бижиктерин тывыскан.
Бистиң корр.
Чиңгис СААЯНЫҢ тырттырган чуруруктары.
“Шын” №96 2024 чылдың декабрь 14