Россия Федерациязының субъектилериниң «Сибирь дугуржулгазы» регионнар аразының экономиктиг кады ажылдажылганың регионнар аразында ассоциация кежигүннериниң ээлчеглиг хуралы Кемеровога болуп эрткен. Сибирьниң ниити төлевилелдерин боттандырары-биле холбашкан амгы үениң айтырыгларын аңаа көрген.
Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев ужуражылганың киржикчилеринге байырын чедиргеш, ниити айтырыгларны шиитпирлээр талазы-биле регионнарның сырый ажылын демдеглээн: «Командалыг ажыл үре-түңнелдиг болурун үе бадыткаан. Кады күжениишкиннерниң ачызында Сибирьни хөгжүдериниң өзек айтырыгларын шиитпирлеп шыдаан бис».
Бо чылдың апрельде ол округтуң куратору болур Россия Федерациязының Чазааның Даргазының оралакчызы Дмитрий Патрушевтиң эгелээшкини-биле федералдыг болгаш регионалдыг эрге-чагыргаларның, күрүне корпорацияларының, бизнес болгаш эртем ниитилелиниң хөделиишкиннерин дүүштүреринге Россия Чазааның Координация төвүнүң баазазында ажылдаткан төлевилелдер удуртуп башкарарының тускай системазын ажыглаар ужурлуг «Сибирь федералдыг округту хөгжүдер хемчеглерни боттандырары» деп 62 дугаарлыг ажыл-херекти тургузар. Ол болуушкун шупту регионалдыг хөгжүлде программаларының хемчеглерин каттыштырып, ниити бедик үре-түңнелди чедип алыр.
Хуралдың киржикчилери 62 дугаарлыг ажыл-херектерде көрдүнген хемчеглер-биле 2035 чылга чедир Сибирь федералдыг округтуң социал-экономиктиг хөгжүлде стратегиязын боттандырар планның күүселдезин дүүштүрер округтуң оперативтиг штавының ажылын чурумчудар талазы-биле айтырыгны шиитпирлээринче онза кичээнгейни угландырган.
Анатолий Серышев планны боттандырарынга шаптыктап турар айтырыгларны штаб дүрген илередип, ооң-биле доктаамал ажылдаарын айыткан: «Хуралды кварталда бир катап эрттирери чугула. Штаб хуралының түңнелдеринге даянгаш, федералдыг төпче киирер санал-оналдарны болгаш ниити турушту белеткээр».
Бүрүн эргелиг төлээ Сибирь чоннарының бирги чайгы спартакиадазының ажыдыышкыны-биле байыр чедиргеш, маргылдаалар спортчу чижилгелиг болгаш эп-найыралдыг байдалынга эртеринге бүзүрелин илереткен. Маргылдааларда тускай шериг операциязының хоочуннарының киржилгези чугула деп бүрүн эргелиг төлээ демдеглээн.
«Кижи чүнү-даа кылып шыдаарын олар боттарының үлегери-биле бадыткап турар, кол чүүл – тиилелгеже чүткүл, чаа бедиктерни чедип алыр күзел, чаа шиитпирлерже шимчээри» - деп, ол немээн. Келир үеде мындыг мөөрейлерни ийи чылда чаңгыс катап эрттирери көрдүнген. Сибирьниң кышкы бир дугаар спартакиадазын 2027 чылда Красноярск крайга эрттирер деп шиитпирлээн.
Ада-чурттуң Улуг дайынынга Тиилелгениң 80 чылының бүдүүзүнде «Улуг Сибирь. Тиилелгеге үлүг-хуузу» деп информастыг портал ажыттынган. Сибирь дугуржулгазы регионнар аразының ассоциациязының күүсекчи комитединге Сибирь регионнарының Тиилелгеге киирген үлүг-хуузунуң дугайында төөгүлүг медээлерни дилээр, ону бадыткаар болгаш парлаар ажылдарга хамаатыларның хөйү-биле киржирин хандырып, ол төлевилелди боттандырар хемчеглерни уламчылаарын дааскан.
Бо чылдың июнь 18-тен 21-ге чедир эртер Санкт-Петербургтуң чээрби сес дугаар делегей чергелиг экономика форумунга Сибирь федералдыг округ регионнарының коллективтиг экспозициязын белеткээр ажылдарны доозарының дугайында чугаалашкан.