Хендергениң төлептиг кенни
Хендирбези бедик боорга,
Мунуксай-ла берген-не мен.
Хендергези делгем боорга,
Чурттаксай-ла
берген-не мен деп өгбелеривис ырлажып чораан.
Мээң кыска чүүлүмнүң маадыры Долаана Седип-оол чурумалдыг Сайлыг суурда чурттап-ажылдап чоруур. Ынчалза-даа ол Хендерге кенни.
Сайлыг школазында орус дыл, чогаал башкызы болгаш, ном саңы-биле тудуш харылзаалыг мен. Бичежек шевергин мага-боттуг, кире бээрге-ле, бир-ле чүүлдү кылган олурар ажылдакчыны эскерип кааш, сонуургаарымга, бистиң Хендерге кенни болду. Ажылынга кызымак, келген номчукчуларының дилээн дораан күүседир, номнуң камналгазы дээш боттуг ажылды чорудуп турар. Класстарга библиотека кичээлдерин шынарлыг эрттирип турарын демдеглекседим.
Билдингир чурукчу Надя Рушеваның дугайында материалды бөлүк башкылар, өөреникчилер-биле белеткээш, интернет четкизинге база салдырдылар.
Долаана Кызыл-ооловна амыдыралында бергени көрүп, уругларының ачазын аныяк назынында чидирген-даа болза, 5 ажы-төлүн өөредип, төлептиг кижилер болзун дээш, бар-ла күжүн салып чоруур. Ол уруг-дарыын шыдаар шаа-биле деткип, янзы-бүрү мөөрейлерге, спортчу маргылдааларга киириштирери чаңчыл болган кижи.
Ол – чүгле кызымак ажылдакчы, эки ава эвес, удазынга ораашпас ус-шевер кижилерниң бирээзи.
"Аъдының бажы эрте хоя берген" ооң уруг-дарыының ачазы база хоомай эвес адаларның бирээзи чораан. Кончуг берге үелерде чонун аай-дедир аргыштырып, амыдырал дээш кызымаккай чораанын чону сактып чоруур. Оолдары бичии турда-ла, оларны эштери-биле машиназынга сөөртүп, хүрештирип чораанын мен чаптап, магадап көөр турдум.
Ава-ача бүрүзү бо өг-бүле ышкаш ажы-төлү дээш харыысалгалыг, амыдыралдың бергелеринге туруштуг болуп, оларның келир үези дээш чурттап чоруур болза, тыва чон моон-даа улам сайзыраңгай, эртем-билигже, чаа чүүлдерже чүткүлдүг болур боор.
Ынчангаш базарга көк, эдерге хек Хендергеге Долаана Кызыл-ооловна ышкаш төлептиг, ус-шевер, кызымаккай кенээттер көвүдеп-ле турзун!
Анна ЧЫМЫЫЖЫК,
Сайлыг школазының орус дыл, литература башкызы.