Соталыг харылзаа станциязын тургускан
Апрель 11-де Тожунуң Ырбан суурунга Тываның информастыг технологиялар төвүнүң специалистери фемтосотту – 1 километр радиустуг биче күчү-күштүг баазалыг станцияны тургускан. Тайга черде турар Ырбан суурга бо дээрге эң эки технологтуг шиитпир-дир – деп, төптүң директору Чингис Ондар тайылбырлаан.
«Бо хүннерге чедир Ырбан суурга кажан-даа соталыг харылзаа туруп көрбээн: бүдүн суурга чаңгыс таксофон ажылдап, ында-хаая солуннар болгаш чагаалар чедирер, кол медээлер тарадыкчылары почтачылар турган.
Бо хүннерде Тожу – эпидемиологтуг төптүң кичээнгейинде. Маңаа дөрт хонук бурунгаар регионда коронавирус халдавырының бир дугаар таварылгалары илереттинген. Тываның Баштыңы Шолбан Кара-оолдуң даалгазы езугаар, регионнуң эң шыырак эмчилери, эрге-чагырга болгаш эрге-хоойлу органнары, санитарлыг постулар дүн-хүн чок ажылдап, дизельдиг электри станциялары ажылдап, реанимация оруннарын салган. А бо хүннерде ында соталыг харылзааны тургускан.
Ам ырбанчылар соталыг харылзаа дузазы-биле сагыш аарып, дүвүреп турган чоок улузунче, төрел-дөргүлүнче долгап каар аргалыг апарганнар.
Ол ышкаш Тываның аңгы-аңгы булуңнарында чурттап турар кижилер чаңгыс чер-чурттугларын деткип, социал четкилерде «Тожу, силер-биле кады бис» деп кыйгырыгны бижип турарлар. Чурттакчы чон бүрүзү Тожунуң кадык-чаагай чоруу дээш тейлеп турар.
Ырбан суурнуң өөреникчилери бот-өөредилгеже шилчээн
Апрель 13-тен эгелеп, чуртта коронавирус талазы-биле тургустунуп келген эпидемиологтуг байдал-биле холбаштыр, школачылар дистанциялыг өөредилгеже шилчээн. Ынчалза-даа регионнуң чамдык өөреникчилериниң онлайн медээни алыр аргазы чок, оларга Тываның девискээринге дөрт хонук бурунгаар коронавирус халдавырлыг аарыының баштайгы демдектери илереттинген Ырбан суурнуң школазының өөреникчилери хамааржыр.
Амгы үеде Ырбан школазында 39 өөреникчи бар, оларның 13-ү эге класстарда, 24-ү ортумак школада, а ийизи 11 классты доозуп турар.
Өөредилге яамызының дужаалын езугаар, уругларның өөредилгезин организастаарының 4-кү аргазын айтып тодараткан. Ол езугаар электроннуг почта хааржактарын таварыштыр, өөредилге материалдарын чорудуп бергеш, бот-өөредилгени организастаан.
Школаның 39 өөреникчилеринге план езугаар эртемнерниң онаалгаларын саазын кырында белеткеп кылган. Күүсеткен онаалгаларны хайгаараары-биле, башкының болгаш өөреникчиниң дневниктерин ажылдап кылган.
Өөреникчи бүрүзүнүң күүседир ужурлуг материалдарын халдавыр чок арга-биле ада-иелеринге дамчыдар. Школачылар саазын кырынга бердинген онаалгаларны боттары кылып күүсеткен соонда, база-ла ада-иелери таварыштыр дамчыдар.
Бистиң корр. #Шын