Якут Республикага күш-культура шимчээшкининиң 100 чыл оюнга база Олимпий оюннарының чемпиону Роман Дмитриевке тураскааткан делегей чергелиг хостуг хүреш маргылдаазы март айның ортаа үезинде Якутск хоорайга болуп эрткен. Аңаа Азербайджан, Армения, Узбекистан, Таджикистан, Киргизия, Казахстан, Моол, Греция, Иран, Белоруссия, Молдова болгаш Россиядан 185 эр, 83 херээжен мөгелер киришкен.
Бо улуг маргылдаага бистиң республикадан 7 мөге (5 оол, 2 уруг) киришкеннер. Бистиң 3 мөгевис маргылдаага шыырак киржип, 3-кү шаңналдыг чер дээш хүрешкеннер. 61 килге 35 мөге аразындан Кызылдың олимпийжи курлавыр училищезиниң сургуулу Сагды Давид 3-кү черге төлептиг болган (тренери Сүгдер Ламажап). Херээжен мөгелер аразынга 62 килге база-ла олимпийжи курлавыр училищезиниң сургуулу Киш-Кулаа Кыргыс чараш, дидим хүрешкеш, 1-ги черже үнүп, тиилекчи болган. Киш-Кулааның эжи Лиана Сандак 59 килге 3-кү черни чаалап алган ( иелдирзиниң тренерлери Айдың Достай биле Россияның чыынды командазының тренери Лориса Ооржак).
Ада-чурттуң Улуг дайынының киржикчизи Совет Эвилелиниң Маадыры Базар Ринчинге тураскааткан Бүгү-россия чергелиг хостуг хүреш маргылдаазы Агинск-Бурятск округтуң төвү Агинск хоорайга болган. Аңаа бистиң мөгелеривис чедиишкинниг хүрешкеннер. 61 килге 2 дугаар шаңналдыг черни Седен Кежик (тренерлери Донгак Эртине-Маадыр, Менги Мортуй-оол), 74 килге Казырык Сайын чараш хүрешти көргүзүп, 1-ги черже үнгеш, тиилекчи болган (тренери Менги Мортуй-оол).
Совет Эвилелиниң Маадыры Базар Ринчинге тураскааткан Бүгү-россия чергелиг хостуг хүреш маргылдаазынга тыва мөгелерден 1-ги черни чүгле Владимир Күжүгет 40 чыл бурунгаар чаалап алган.
Бистиң республиканың Хостуг хүреш федерациязының дыңнадып турары-биле, Якутияга болур Россияның бирги чери дээш маргылдаага киржир эргени 14 мөге, а 18 харга чедир мөгелер аразынга киржир эргени 40 ажыг мөгелер чаалап алган.
Ол ышкаш бо чылын бүгү Россия чергелиг “Азия төвү” дээш оон-даа өске маргылдааларны эрттирери көрдүнүп турар.
Кулаа дыңнавас болгаш 18 хар чедир мөгелер аразынга Россияның бирги чери дээш Владимир хоорайга март 15–16 хүннеринде эрткен хостуг хүреш маргылдаазынга Эртине Доржукай 2-ги шаңналдыг черни чаалап алган (тренери Аржаан Ооржак).
/ Алексей ЧАМБАЛ-ООЛ.
Киш-Кулааның тиилелгези
24 марта 2023
37